E mihor deseonan pa un 2022 yen di prosperidad!

Aña 2021, mescos cu e aña anterior, no tabata esun di mas facil. Sinembargo, usando creatividad y determinacion, nos di Wired Media, e cas di www.noticiacla.com a sa di surpasa tur obstaculo den caminda y sigui mantene bo informa di e forma mas responsabel posibel. E prome pa nos gradici, ta Abo, e lector cu tabata fiel na e portal, y mas importante, a keda fiel y ta mustra di lo sigui mescos den 2022. Na tur nos casnan comercial, primordialmente esnan fiho, cu no a basila y sigui nan sosten cu nos den 2021, y unda cu tur a compromete nan mes pa sigui cu nos den 2022 atrobe. Pa esey, un Danki di curazon. Tambe esnan no fiho, cu aunke no constante, a sa di sostene e portal aki cu nan campañanan y otro momentonan di importancia comercial. Un DANKI na boso tambe! Nos ta conciente cu den tempo di crisis, di pandemia, e opcionan comercial ta limita y tin biaha dificil. Y asina mes boso a scohe pa sigui cu e portal aki. For di su inicio un 7 aña pasa, e meta di nos tabata pa ta diferente, tanto den contenido, cantidad y sigur e calidad. Y por bisa cu tur trankilidad cu huzgando a base di criterianan usa, nos a logra esaki te awor. Loke nos tin menos na cantidad (di articulo), nos ta presenta den (mas) calidad y mas cu tur, e confiabilidad di e loke cu nos ta publica. No tur ora, e cantidad ta mas importante. E calidad y confiabilidad ta e factor determinante pa noticiacla. 

E aña aki atrobe nos a saca nos Personahe di Aña. E premio e biaha aki a bay pa nos deportista internacional Sarah-Quita Offringa cu a logra su di 18 y 19 titulo internacional respectivamente den e deporte di Windsurf, Slalom y Freestyle. Sarah-Quita ta pone e logro mustra facil, pero esaki ta leu di ta e caso. Y nos a sinti cu, sin kier ta mucho negativo, e no a of tabata hayando e reconocemento cu e merece. Y nos kier a mustra cu nos ta kere den dje y ta conciente di dificultad di e logro riba tereno internacional, y e consistencia y importancia di su logronan, no solamente p’e, sino pa nos isla completo. Nos a sigui Sarah-Quita for di comienso y pa nos portal, e tabata un fuente di atencion cu tabata semper hala hopi atencion di nos lectornan. E reaccion di e lectornan ora cu nos a publica y entrega e premio tambe e siman aki, tabata asina grandi, cu ta confirma cu nos decision tabata esun miho. Sarah-Quita, Pabien!. 

Pa 2022, e intencion ta pa nos sigui, y bira aun mas agresivo, mas moderno, y logra nos metanan, no obstante e pandemia, y presenta cierto productonan nobo y interesante. Na Abo, nos pilar di sosten, un DANKI di curazon. Nos promesa y compromiso ta pa continua cu e mesun energia y determinacion, pa ABO haya e noticia cu ta importante y cu ABO mester pa por progresa, sea con bon of malo e noticia por ta. Si ta noticia, bo lo haye. Y finalmente, na nomber di nos cas Wired Media, nos kier a desea ABO tur cos bon pa 2022, y cu e aña nobo ta uno yena cu energia, bendicion y bon deseo. Feliz Aña 2022!