Vroegop: Relacion entre hospital y e laboratorio ta hustifica keda cu e entradanan di test di Covid19

ORANJESTAD – “ Hospital Horacio Oduber y e laboratorio di hospital, Fundacion Servicio Laboratorio Medico Aruba (FSLMA) enberdad ta institutonan diferente, pero tin si un acuerdo di cooperacion (SLA), mesun directiva y Raad van Toezicht”. Asina director medico di Hospital Jacco Vroegop ta contesta noticiacla riba e tema di AZV y su motibo pa no kier usa laboratorionan priva pa test Covid19. Ora cu mas tempran, tanto minister di salud Dangui Oduber como director di AZV Edwin Jacobs a reacciona,  cu AZV no ta wak motibo pa expande cu mas laboratorio, a bin e reclamo cu no por ta asina cu dos diferente fundacion ta pasa placa pa otro sin mas. 

FUNDACION NON PROFIT

Ademas, sr Vroegop ta sigui bisa, cu ambos fundacion ta non- profit. Pues no ta traha pa haci ganashi. Y tur surplus ricibi ta bay bek den cuido. “Esaki den ambos instancia contrario na e caso di e laboratorionan priva” e director ta sigui bisa. Ademas, e labnan priva no por haci peticion pa di dos liña ( tweedelijnsaanvragen), cu ta algo cu HOH/FSLMA s por. Esaki ta den beneficio di e rapidez y e exactitude den cuido di pashent, e director ta sigui bisa. “Esaki pasobra e testnan ta disponible mesora pa e specialista y pashent cu ta pone cu nan por wordo sigui miho. “Banda di esaki, hospital a inverti for di prome dia den e set up di e cuido di Covid test, Aruba Health App, etc. E laboratorionan priva, e tempo ey no tabata kier esey mes” Vroegop ta finalisa bisando. Cu esaki, Hospital ta splica nan banda di pakico nan ta funciona asina, entre e dos fundacionan relaciona cu testmento di Covid19.