Aruba a registra casi 700 caso positivo di Covid19! Record nobo

ORANJESTAD- Manera por a spera, Aruba a yega otro cifra record awe di casonan positivo pa un dia. Cu 692 caso positivo, casi 700, esaki ta bira e record nobo. Mes momento, nos tin casi 3000 caso activo (2769) cu lo por wordo yega 3 mil diabierna caba. Ademas, ICU tambe a registra dos persona cu a keda interna awe, despues cu pa varios dia no tabatin ningun hende di Covid19 den ICU.

CIFRANAN TOTAL

Segun resumen di awe  38 persona a recupera y un total di 692 caso nobo di COVID-19 a keda registra di cual 85 ta no-residente. E cifranan aki ta representa un 'Positivity rate' bou di nos residentenan di 59%. E cantidad di casonan activo di COVID-19 pa awe ta 2769 y cantidad di fayecidonan relaciona cu COVID-19 ta 181. Datos ta ilustra casonan nobo di COVID cu un averahe semanal di 365 caso pa dia y un averahe di 'positivity rate' semanal di 47% pa dia. 

HOSPITAL

Actualmente na Aruba tin 7 persona interna debi na COVID di cual den ICU tin 2 persona y riba piso general tin 5. Na Colombia tin actualmente 3 persona den ICU y ninguno (0) riba piso general.