AZV no tin motibo pa amplia cantidad di laboratorio pa haci test pa Covid19

ORANJESTAD – Por lo pronto AZV no ta mira e motibo pa amplia cantidad di laboratorio pa haci test pa Covid19. Esaki ta nifica cu   laboratorionan priva lo no haya e posibilidad pa test bou di AZV manera cu nan a solicita. Segun e director ir. Edwin Jacobs a contesta noticiacla.com diahuebs, AZV ta vigila di cerca si Labhoh, oficialmente conoci como Fundacion Servicio Laboratorio Medico Aruba (FSMLA) ‘por cumpli cu e demanda di nos aseguradonan’. “Tanten cu esaki ta e caso, AZV no ta mira motibo pa amplia e cantidad di laboratorionan pa haci e testnan” sr Jacobs a sigui bisa. 

PAKICO NO POR USA LABNAN PRIVA

E pregunta di noticiacla a keda haci inicialmente diaranson durante un conferencia di prensa riba e tema di Covid19 na minister encarga cu salud Dangui Oduber. Specificamente pakico no ta permiti otro laboratorionan pa tambe haci test pa localnan, cubri pa AZV. E mandatario a contesta e ora cu “AZV ta cubri PCR test na Labhoh, pasobra hospital ta inverti e entrada ey bek den hospital”. Mes momento e mandatario a sigura cu e porta ta habri pa esaki cambia. Awe a compronde sinembargo di AZV cu e porta por lo pronto ta keda cera. 

RIJNAN LARGO

Ora cu a puntra e director si e rijnan largo pa test e dianan aki no ta un motibo netamente pa duna otro laboratorionan (esnan priva) e chens pa tambe test y asina baha e presion di e labhoh y/of hacie mas facil pa localnan test mas liher sin tin cu perde oranan largo den rij. Segun Jacobs, FSMLA a amplia su capacidad y ta cumpliendo. “Di loke nos ta comprende di FSMLA nan tin capacidad pa maneha esaki” e director a sigui bisa. Un reaccion di banda di algun laboratorio, cu loke cu ta sosode cu FSMLA no por pasobra ta trata di dos entidad separa y no por move fondo asina di uno pa otro, sino mas. Riba esaki, sr Jacobs a referi na hospital pa un contesta.