Porfin polis por duna multa pa violacion di ley di cacho

Posted on 3/6/2015, 5:36 PM AST | Updated on 3/6/2015, 5:41 PM AST

ORANJESTAD – Polis awor por duna multa si un persona viola e ley di cacho. Esaki tabata e pida cu tabata falta pa polis actua contra e violacionnan. Manera ta conoci, for di momento cu aña a bolter, tabata planea pa autoridad cuminsa implementa e ley. Pero pa motibo cu ainda cierto componentenan no tabata na lugar ainda, esaki no por a cuminsa. Un di nan, tabata e multa stipula pa ministerio publico. Te cu awor, polis por a solamente traha un procesverbaal y duna un advertencia. Esey ta cambia awor.

VARIACION DI MULTA

Ministerio Publico a, cu aprobacion di minister di Husticia, a fiha e transaccionnan den cuadro di Ley di Cacho. Cuerpo Policial di Aruba (KPA) ta autoriza desde awor pa ofrece transaccionnan di entre 300 y 1000 florin, pa cada violacion, na doñonan di cacho cu no ta tene nan mes na Ley.

 TRANSACCION

E transaccionnan ta como lo siguiente:

Ora di violacion di e obligacion pa cuida e cacho (articulo 2 di Ley di Cacho), e transaccion cu ta wordo ofreci ta 750 florin. Prome cu esaki ta haya un warning di polis. Ora di recidive (ripiti e violacion), e transaccion ta bay pa 1000 florin.

Articulo 2 di e Ley di Cacho ta bisa cu e doño di e cacho ta obliga pa duna e cacho e cuido necesario. Esey ta encera cu e doño ta percura:

-        pa e cacho come tur dia y tin awa di bebe tur ora

-        pa e ta proteha na tur momento di solo, biento y awacero

-        pa e haya cuido medico di un veterinario ora ta necesario

-        pa e (si en caso ta un cacho mara) dispone di suficiente espacio pa e cana.

Ora di violacion di e prohibicion pa e cacho bay riba caminda publico y tereno di otro persona (articulo 3, lid 1) y ora di violacion di e prohibicion pa causa molester (articulo 3, lid 2), e transaccion ta 300 florin. Prome cu e transaccion ta haya un warning di polis. Ora di recidive, e ta subi pa 500 florin.

Artikel 3, lid 1 ta bisa cu e doño ta obliga pa tuma medidanan pa e cacho no bay riba caminda publico of riba tereno di otro hende. Lid 2 ta bisa cu e doño ta obliga pa percura pa e cacho no causa molester na otro persona.

Ora di violacion di e obligacion di tene e cacho na lishi riba caminda publico (articulo 4), e transaccion ta 300 florin. Esaki tambe ta bin despues di un warning di polis. Ora di recidive, e ta subi pa 500 florin.

Artikel 4 ta bisa cu e doño ta obliga pa tene e cacho na lishi riba caminda publico.

E LEY MES

E Ley riba tene cacho, conoci como ‘Ley di Cacho’ of ‘Hondenverordening’, a wordo aproba pa Parlamento di Aruba na december 2012. Despues cu minister di Husticia a firma e landsbesluit, e Ley a drenta na vigor riba prome di januari 2015.