Oduber: AZV ta cubri PCR test na Labhoh, pasobra hospital ta inverti e entrada ey bek den hospital

ORANJESTAD – ‘Ainda’ no ta permiti laboratorionan priva pa test ciudadanonan local riba Covid19, cubri pa AZV. Asina minister di salud Dangui Oduber a contesta Noticiacla diaranson mainta durante e conferencia riba e tema di Covid19. Aworaki ta solamente laboratorio di hospital por test hende local cubri pa AZV, mientras cu otro laboratorionan priva por test hende local pero cu riba gasto di e ciudadano mes. Mirando e filanan largo e dianan aki, a puntra pakico no ta permiti e laboratorionan priva tambe pa asina mengua e liñanan largo na LabHoh.

SPLICACION

E mandatario a admiti cu e peticion ey pa laboratorionan priva tambe haci e testnan cubri pa AZV. Segun e mandatario (Dangui Oduber:red) semper AZV a mantene e postura estricto cu e ta cubri e testnan cu ta wordo haci nan Labhoh, pasobra e entrada cu e laboratorio ta ricibi di AZV, e ta invertie bek den e problema na hospital. “As we speak nos ta discutiendo si ta bin cambio den e maneho cu nan a introduci” Oduber a bisa, indicando cu esaki ta un decision meramente di AZV mes for di e dia cu e crisis a cuminsa. Pero e no ta descarta cu por haci cambio pa e bira un tiki mas acesibel pa tur hende, pa baha e rij.