Gobierno no ta duna compensacion pa fiestanan cancela pa Covid19

ORANJESTAD – Aruba su situacion ta diferente compara cu Corsou y Hulanda, pa loke ta compensacion pa fiestanan cancela debi na medida di Covid19. Asina minister presidente Evelyn Wever Croes a bisa noticiacla diaranson mainta durante e conferencia di prensa riba Covid19. E pregunta ta si aki tambe gobierno di Aruba lo haci esaki. E contesta tabata no, ainda no y cu ainda esnan cu ta organisa e fiestanan ey, no a haci e peticion. Mes momento, e mandatario a clarifica cu aki tabata un ‘ontheffing special’ a duna riba peticion di e organisadornan mes. A duna esaki, pero siman pasa ora cu cos a bira dificil, a revoca e permisonan necesario. Y Wever ta considera esaki un scenario diferente. Ora cu lockdown y cera cos incluyendo orario cu tabata mester ta habri, e ora posiblemente por papia di compensa, pasobra lo a kita te hasta e orario cu tin pa ley pa ta habri. “Pero e ta un punto cu ta riba agenda ainda” e mandatario a sigura e portal.