Wever: Tin medida extra pero Toque de Queda no ta necesario

ORANJESTAD – Gobierno y Crisis Team no ta wak necesario pa institui un Toque de Queda of un lockdown awor. Asina prome minister Evelyn Wever Croes a bisa diaranson mainta durante un conferencia di prensa riba e tema di Covid19. E conferencia tabata necesario segun e mandatario, debi na e cifranan halto cu tin aworaki di contagio. Pero e medidanan anuncia awe, ta suficiente pa awor pa mitiga e consecuencia. Entre nan, tin ciere mas trempan di negoshi, y restaurant mester limita nan cantidad di hende na mesa na 6, mescos cu Bar unda cu aki por tin maximo 4 mesa di 6 hende. Bandanan por tin 5 hende riba stage, y no ta permiti negoshinan cende pagara despues di merdia 12’or. Y supermercadonan por tin un persona so pa famia pa haci compras. Contrario na loke noticiacla a anuncia, no a anuncia specificamente cu ta prohibit satellite dancing. E decreto di e satellite dancing a keda actualisa for di siman pasa, y negoshinan a compronde cu esaki ta nifica cu no tin satellite dancing entrante awor. Esey ta e motibo cu mayoria si no ta tur a dicidi di cancela nan fiestanan cu tabatin, fuera di esnan despues di mei anochi, cu a keda cancela for di siman pasa. Pues aki tin un aspecto di interpretacion riba e ley di satellite dancing. Tur e medidanan aki ta drenta na vigor dia 30 di December 2021, esta mayan. 

TOQUE DE QUEDA

Hopi a pensa cu lo a bin un Toque de Queda, of un tipo di lockdown, pero esaki no tabata necesario. Berdad cu e cifra di contagio ta halto, pero Omicron, basa riba informacion cu tin, no ta mes peligroso cu Delta, y ta pone cu hospital por maneha e situacion. Omicron su contagio ta dura menos tempo y e gravedad di e contagio ta menos. Esaki ta pone cu mientras cu e cifra di contagio ta halto, no ta hustifica un Toque de Queda aworaki. 

FIESTA CLANDESTINO

Riba pregunta di e portal aki, cu mirando cu no tin Toque De Queda awor,  cu tin basta (mas cu 10) fiesta clandestine cu ta den preparacion, e mandatario a sigura cu polis sa di tur fiesta y lo atende cu esaki corectamente.