Crisis Team cu varios medida nobo, entre nan cancela satellite dancing

ORANJESTAD – Gobierno y Crisis Team ta anuncia medidanan adicional awe mainta den un conferencia di prensa, pa combati Covid19. Un invitacion ayera nochi (diamars) a confirma esaki. Entre e medidanan ‘nobo’, noticiacla por confirma cu ‘eliminacion di satellite dancing’ ta un di nan. Satelite dancing ta e concepto di balia, pero banda di bo mesa envez di balia riba pista di baile. Esaki ta tambe un di e motibonan cu varios fiesta na caminda pa fin di aña a keda cancela abruptamente. Nan tur a haya notificacion di Crisis Team cu esaki no por mas. Esey a pone cu no ta ‘make sense’ pa tin varios banda grandi, y ningun hende por balia. A opta e ora pa cancela e fiestanan aki, cu tabatin permiso te 1’or di marduga. 

MAS MEDIDA

Lo tin mas medida, y por pensa den direccion di cierre mas tempran di negoshi, menos hende na mesa di restaurant, y samenscholings verbod. Tur esaki mester wordo anuncia supuestamente awe mainta durante e conferencia di prensa. 

FIESTA CLANDESTINO

E portal aki a compronde cu tin por lo menos 11 fiesta clandestine cu ta den preparacion entre awor cu fin di aña, y mirando cu no tin  Toque de Queda, e caminda ta keda liber pa e fiestanan aki tuma lugar cu tur consecuencia. 

RABIA 

Hopi compania y negoshi nocturno ta rabia cu e situacion, y ta mustra cu ta midiendo cu dos midi, unda cu supermercadonan den dia y otro negoshinan grandi ta yen yen di hende riba otro, pero anochi kier cera tur cos pa ‘evita brote’ di e virus. Keda pediente pa e conferencia awe mainta 10’or.