Problema di ‘leak humano’ den oficina di minister ta resolvi

ORANJESTAD – E problema di e ‘leak’ cu tabatin den oficina di minister Alex Schwengle, a keda resolve. Por lo menos esaki ta e indicacion awe mainta. Manera NoticiaCla.com a raporta ayera, e trahadonan y e minister tabata programa pa ta bek na trabou awemainta despues di casi un siman cu nan a wordo ‘manda cas’. Awe mainta tin un trahado menos na oficina. Y lo ta trata di e persona  J.K. cu tabata e ‘leak’. No ta conoci kico a pasa cu e persona, pero e no a bolbe oficina mas. Cu esey tambe, ta parse cu e problema a keda resolvi y tur otro hende por keda trankil awor. E mandatario mes no tabata disponibel pa comentario awe mainta ainda.

SIMAN PASA

Un siman despues cu e noticia a plama cu minister a rabia, manda su staff cas y biaha pa Panama, e minister , -Alex Schwengle-, ta bek na trabou. NoticiaCla.com a compronde cu e staff lo ta bek tambe. No ta conoci si e staff completo y kico exactamente lo pasa cu nan. Tampoco ta conoci ainda ki paso e mandatario lo tuma riba e caso di ‘leak’, pero a compronde cu esey lo sali na cla mayan tambe. Esaki ta nifica tambe cu e mandatario a dicidi cu e no ta retira di su funcion como minister. E asunto a bira noticia, ya cu nunca antes un minister a manda henter su personal cas pa un periodo, sin motibo y mas importante, cu asina hopi misterio. 

E SUSESO

Tabata un siman pasa cu NoticiaCla.com a bin cu e informacion riba e caso aki. E momento ey NC a informa cu e mandatario no a retira como minister, -manera cu rumornan tabata pretende-, pero si tin problema den su campo di trabou. Specificamente su oficina. E problema tabata di tal forma cu e mandatario a rabia asina hopi cu e la dicidi di manda su staff completo cas te otro siman. Mientrastanto e mes a biahando pa Panama pa atende un congreso medico di PAHO. A compronde e momento ey cu e lo a dicidi den e proximo dianan kico su siguiente paso lo ta. Informacionnan cu NoticiaCla.com tabatin ta bisa cu e problema cu a surgi ta a base di ta un ‘leak’ cu lo tin den su oficina unda cu algo lo a sali di su oficina.