Aruba ta pasa 1500 caso activo total di Covid19, y por yega 2000 pa weekend

ORANJESTAD – Aruba a bula pasa 1500 caso activo diamars, despues cu, manera cu noticiacla a presenta den forma di primicia anteriormente, cu e casonan nobo riba un solo dia a registra 439. Y mirando e cantidadnan cu a test awe, e no ta descarta cu pa fin di siman, e cifra total por yega 2000. Oficialmente, despues cu noticiacla a presenta e cifranan, Crisis Team a confirma esak cu mas informacion. Segun resumen di awe  53 persona a recupera y un total di 439 caso nobo di COVID-19 a keda registra di cual 86 ta no-residente. E cifranan aki ta representa un 'Positivity rate' bou di nos residentenan di 49%. E cantidad di casonan activo di COVID-19 pa awe ta 1506 y cantidad di fayecidonan relaciona cu COVID-19 ta 181. Datos ta ilustra casonan nobo di COVID cu un averahe semanal di 204 caso pa dia y un averahe di 'positivity rate' semanal di 37% pa dia. 

Actualmente na Aruba tin 6 persona interna debi na COVID di cual den ICU no tin ningun (0) persona y riba piso general tin 6. Na Colombia tin actualmente 5 persona den ICU y ninguno (0) riba piso general.