Minister Oduber: Trahadonan deteni pa iregularidad na DVG no tabata ambtenaar!

ORANJESTAD – Minister encarga cu Salud, Dangui Oduber den un reaccion diabierna, a sigura cu e trahadonan cu a keda deteni den e caso di fraude na DVG pa iregularidadnan, no tabata ambtenaar di gobierno, y no tabata traha pe. E mandatario a recorda cu for di algun tempo caba tin un investigacion andando riba kehonan cu a wordo entrega riba personal cu a wordo contrata na DVG pa yuda den e programma di vacuna. “E personan en cuestion no ta ambtenaar y a haya un contrato temporal pa yuda den e programma di vacunacion pa full Aruba” e mandatario ta sigura. E la confirma tambe cu e tabata na altura di e situacion ora cu inicialmente esaki a sosode. “ Minister Oduber a wordo informa algun tempo atras riba e casonan aki y conforme tur procedura departamento di salud publico a actua riba esaki”.

TUMA ACCION

E mandatario a sigura cu na momento cu un melding a drenta riba posibel fraude cu certificadonan di vacuna, DVG a tuma accionan di inmediato. DVG a tuma decision pa cuminsa un investigacion interno y a tuma e decision pa termina e contract. Consequentemente un keho a ser entrega na ministerio publico pa di e forma aki investigacion por wordo haci.

E caso aki ta den man di ministerio publico y ta laga husticia haci su trabou.

DENUNCIA CORANT

Minister Oduber mientrastanto diabierna mainta a confirma cu e la exigi un rectificacion di e matutino Bon Dia Aruba, pa coregi un noticia cu a sali riba nan portada indicando cu e trahadonan en cuestion tabata coordinador di e mandatario. E mandatario a bisa den un reaccion cu e ta lamenta cu tur cos na Aruba literalmente tur cos kier haci politica cune. “Ta pesey tambe minister Oduber ta haya importante pa corregi e noticia falso di matutino Bon Dia Aruba caminda den nan headline frontpage di 24 december 2021 ta menciona cu e sospechosonan di falsifica certificado di vacuna lo ta ex coordinador di minister Oduber” e mensahe ta bisa. Segun Oduber, e noticia no ta corecto.”Esaki no ta e caso, nan no ta coordinador y no tawata coordinador tampoco di minister Oduber” e ta sigui bisa, condenando e forma con segun e mandatario, e medio “ta bai over na insinuacionan sin base, sin prueba just pa crea sensacionalismo”. “ Matutino Bon Dia Aruba lo bai ricibi un carta pa rectifica e noticia falso aki y corregi e texto cu a wordo publica cu tin informacionan no correcto!” e mandatario a finalisa bisando.