Aruba a nenga entrada di bapor crucero awe debi na Covid19 abordo

ORANJESTAD – Autoridad portuario di Aruba a nenga entrada awe diahuebs na e bapor crucero Carnival Freedom, debi cu tin contagio di Covid19 abordo entre e tripulantenan. Anteriormente Bonaire tambe a nenga e entrada. Minister Dangui Oduber di Turismo a confirma esaki awe mainta pa noticiacla, pasobra esaki ta ‘conforme e protocol’, refiriendo na protocol tocante Covid19 y bapornan crucero.  

CARTA

E capitan mester a manda un carta pa su pasaheronan, bisando cu nan no por a baha na Bonaire (y tampoco Aruba awe). “Desafortunadamente oficialnan na Aruba tambe a notifica nos awor cu nos no por desembarca, y como tal mester a cambia curso” e capitan a bisa entre otro. Fuentenan ta bisa cu por lo menos 2.5% di e tripulantenan a test positivo pa Covid19. Teniendo na cuenta cu e cantidad di tripulante abordo ta 1150 persona,  por tene na cuenta cu por lo menos 28 persona lo ta contagia. E bapor crucero tabata na Corsou dia 21, cu ta ora cu autoridad a informa Bonaire di e casonan positivo. No ta conoci si e pasaheronan a baha na Corsou si. E bapor tabata riba un trip di 8 dia saliendo for di Miami dia 18 y tin 4 dia riba laman y bishitando 3 waf. Esaki awor a cambia. 

 .