Secretario Knops ta contradeci Premier Wever riba prolongacion di protocol

ORANJESTAD – “BZK (Ministerio di Binnenlandse Zaken di Hulanda cu ta resorta bou di secretario di estado demisionario Raymond Knops:red) nunca a duna nos e oferta di tres aña. Niun rato so” Asina prome minister Evelyn Wever Croes,a sigura periodista Tito Laclé den e programa Noticiacla LIVE diamars anochi. E ta papia riba e oferta pa e duracion di un protocol nobo cu mester a bin na lugar di e protocol actual riba supervision financiero. Knops sinembargo, 12 ora despues cu e programa a pasa, ta contradeci e prome mandatario den un carta fecha awe diaranson 22 di December 2022, cu Hulanda ‘a trata di yega na un solucion door di ofrece pa prolonga e protocol en cuestion cu e acostumbrada 3 aña’. Un declaracion cu Noticiacla a produci den un otro articulo y cu e documento original como muestra. Segun Knops, enberdad Hulanda kier a prolonga e protocol sin fecha, pero Aruba a nenga. Y ora cu a ofrece 3 aña, tambe Aruba a nenga. Wever, sinembargo, ta bisa cu nunca e oferta ey a bin. “Dus aki nan tin un hende cu ta dunando bo informacion cu no ta corecto” e premier a sigura Laclé, ora cu e la confronta e mandatario cu e informacion di 3 aña como sugerencia di Hulanda. E pregunta awor, ta ken ta papia berdad. “BZK nunca a duna nos esey. BZK a keda para ariba cu ta sin un eind datum”, e mandatario a bolbe ripiti. 

TRES AÑA

Segun e mandatario a sigui bisa, tres aña ta mes largo cu e protocol actual, y cu si ta tres aña mes e protocol ta wordo alarga, e no tin sentido, pasobra nos ta post Covid, y e protocol ta pre Covid, indicando cu esaki cu e condicionan tabata full diferente. E mandatario tin duda cu ta dura asina largo pa e Raft keda cla, sigur si ta Hulanda ta encarga cu esaki. Y si ta tres aña ta prolonga e protocol, ta algo cu mester bay Parlamento pa aproba pasobra e ta redobla e protocol. Segun e mandatario, Hulanda no kier pa e bay Parlamento pa e aprobacion. “Y unabez cu bo no kier pa mi bay parlamento, bo ta bezig ta pone mi viola locual ta nos constitucion”. Aki tambe Hulanda ta contradeci e prome mandatario, manera nos a relata den un articulo anterior, indicando cu “Ta na Aruba pa trata e prolongacion y e possible consecuencia di esaki. No ta Hulanda ni na Gobierno di Hulanda su intencion pa ‘bypass’ Parlamento” Knops ta bisa den e carta na Tweede Kamer.

NEGOSHA  

Segun e prome mandatario, e la informa Hulanda cu nan a negosha e Raft (e Rijkswet riba supervision financiero) cu tin tur e normanan stipula cu Aruba por biba cu ne. Pero Hulanda, segun Wever, no por sigura pa ki tempo e Raft ta bin cla, pa cual a propone (manera cu Knops a bisa den su carta na Tweede Kamer diaranson). Tin problema cu e Raft, y cu nan no ta wak e Raft keda cla pa awor, y cu ‘Hulanda no tin pura cu ne’, y pa cera un protocol di overgang entre esun actual y e Raft. Algo cu segun Wever, a bay di acuerdo pa papia ariba. Scucha e declaracion di premier Wever AKI.