Hulanda ta duda den seriedad di Aruba, Corsou y St Maarten pa cu e tratamento di COHO

DEN HAAG – Gobierno di Hulanda tin duda den ‘e boluntad sincero y  honesto di e islanan (Aruba, Corsou y St Maarten) pa seriamente continua cu e Rijkswet di COHO y pa Aruba di e RAFT (supervision financiero) y e reformanan necesario. Asina secretario di estado demisionario Hulandes Raymond Knops ta bisa Tweede Kamer den un carta diaranson, cu ta den poder di Noticiacla. Knops ta mustra cu tur tres pais a priminti algo, pero no a cumpli. Esta cu a priminti cu lo trata e asunto den nan respectivo conseho di minister.  “Pero mi no a tende nada mas” e mandatario ta sigui bisa. Ta despues di un carta net prome cu RMR, e tres prome ministernan a informa cu e acuerdo cu a wordo cera dos siman prome, no por a wordo confirma politicamente. “Esaki ta fastioso pa compronde, basa riba palabracion anterior y e ta preocupa mi hopi”. Cu esaki, e formalisacion di e Rijkswet Aruba financieel toezicht (RAft) tambe ta sali for di bista. E mandatario ta recorda cu e progreso den e area aki tambe tabata parti di condicion pa por a haya sosten di likides. Algo cu ta logrando cu e landspakketen, y pa cual e ta elogia e islanan, pero riba e tereno di e RAft ta un otro storia. 

DUDA DEN SERIEDAD

E mandatario ta bisa cu mirando e situacion, gobierno Hulandes (no BZK:red), e pregunta ta keda ki posicion e islanan lo tuma awor riba COHO. “E hecho cu e paisnan aki no ta tumando e siguiente pasonan den e proceso di e ley, ta crea e pregunta te con leu, dispuesto y serio e islanan ta den prosegui cu e ley di consenso, y e reforma necesario. Awor cu tin duda unda e paisnan aki ta para, ta dificil pa gobierno Hulandes sa unda nan ta para”. Y segun e mandatario, ta pesey e la haye necesario pa wanta tur decision durante e ultimo conseho di minister di Reino. Lesa e carta completo AKI.