Knops: Prolongacion protocol supervision financiero di Aruba no ta condicion nobo!

DEN HAAG – “E prolongacion di e protocol (di supervision financiero) of otro palabracion riba e norma di presupuesto cu un termino cu ta largo suficiente pa evita un bashi, no ta un condicion nobo”. Asina secretario di estado demisionaro Hulandes Raymond Knops a bisa Tweede Kamer den un carta diaranson. E ta bisa esaki despues cu prome minister di Aruba Evelyn Wever a yama e asunto di protocol un ‘condicion nobo’. Segun e mandatario Hulandes, e prolongacion ta solamente “un consecuencia logico di e falta di un norma di presupuesto claro, entrante 1 di januari 2022”.  

DESACUERDO

Knops den su carta pa Tweede Kamer, ta confirma cu Aruba y Hulanda no a haya otro pa cu e normanan di presupuesto entrante prome di januari. E situacion aki a surgi segun e mandatario, pasobra e protocol actual ta vence riba e fecha ey. “Esey kier men cu entrante 1 di januari 2022 no tin claridad riba e norma pa e supervision financiero” Knops ta bisa. Y segun e mandatario, pa e motibo so ey caba, e la conseha RMR pa no aproba articulo 23 di e LAFt cu ta permiti Aruba desvia di e norma actual di presupuesto. Knops ta sigui bisa cu semper e tabata hopi cla cu Aruba den e ultimo combersacionan, esta cu e prolongacion di e protocol actual ta pa evita un bashi ora cu e protocol actual vence. “Ora cu Hulanda (e no ta bisa BZK, esta su ministerio pa cual e ta responsabel, sino ta referi na gobierno Hulandes completo!:red) a indica cu kier prolonga e protocol sin un fecha final, y cu Aruba a bisa cu nan kier un prolongacion pa solamente un aña, Hulanda a purba haya un solucion door di usa e prolongacion custumbra di 3 aña of te ora cu e RAft drenta na vigor” e mandatario ta continua bisando. E ta sigui bisa cu ora cu Aruba a nenga esaki tambe, Hulanda y Aruba a drenta un impasse. 

INEXPLICABEL

E falta di un acuerdo riba supervision financiero pa Knops, ta algo inexplicabel, den un situacion actual unda cu Hulanda ta yudando cu 903. miyon na sosten di likides. Esey ta motibo tambe cu e falta di claridad tambe ta wanta Hulanda di cera futuro acuerdo of duna mas sosten, segun Knops. “Ta keda na Aruba pa trata e prolongacion di e protocol y e eventual consecuencia, cu Parlamento (di Aruba). No ta na Gobierno Hulandes, ni e intencion di Hulanda pa bypass Parlamento” manera cu Aruba ta pretende. Lesa e carta completo AKI