Vroegop: Hospital por lo pronto por maneha e situacion di Covid

ORANJESTAD – Hospital Horacio Oduber di Aruba ainda por maneha e situacion actual di Covid19, aunke tin reto debi na e construccion actual. E director sr Jacco Vroegop a bisa Noticiacla diamars cu e ta kere cu pa sigur e proximo 10 dia, nan lo ta relativamente den control ainda. Mientras cu cifranan di casonan di Covid19 a cuminsa aumenta atrobe, ainda no tin necesidad pa ‘schaal af’, esta reduci servicionan y ta spera cu lo no mester haci esaki tampoco segun sr Vroegop. Aworaki tin 2 hende den ICU cu Covid, y riba piso tin 7 persona cu Covid. Pero tin tambe 7 hende den ICU cu no tin Covid, pues ICU ta yen si. 

Di 5 OLA OF NO

Pa Hospital, sr Vroegop no ta considera e situacion ainda di tal indole cu nan ta den un di 5 ola di e virus. Di otro banda sinembargo, pa loke ta e cifranan cu Aruba ta registrando segun DVG di e casonan (sin cu nan ta bin hospital), bo por saca e conclusion, segun sr Vroegop, cu porta enberdad e di 5 ola a cuminsa. 

MENOS CAMA

Debi na e construccion actual, aworaki e personal ta haci planificacion eficiente mirando cu no tin hopi cama manera prome, ora cu e pandemia a inicia na 2020. Esaki ta nifica cu e hospital tin cu maneha e situacion cu por lo menos 30 cama menos. Entre e medidanan cu ta usando,  ta purba mantene pashentnan menos hospitalisa cu ta posible. “Si nos mester di mas capacidad pa hendenan cu un estadia mas largo, nos tin un acuerdo cu e hospital na Corsou. Aworaki nan tin hopi capacidad, y si esey no por, tin ainda St Maarten como opcion y Colombia, aunke e ultimo aki a bira mas fastioso debi na e exigencia cu tur hende mester tin tur nan vacuna. Mirando cu e hospital na Bucaramanga (Colombia) tin su propio avion, ta haci excepcion ora cu por pa asina transporta e pasaheronan directo pa e hospital. Pero esaki ta evalua pa cada caso individual. 

AUMENTO GRANDI DI CASO

E siman aki, e cantidad di pashent di Covid19 a casi double, di 4 pa 8, y cu Omicron, por spera cu lo triplifica. “Enberdad, esaki ta bay hopi lihe, pero e a aumento no kier men necesariamente cu nan ta drenta hospital mesora” sr Vroegop ta bisa. E ta corda cu ora cu registra pashentnan di Covid, ta dura casi dos siman despues prome cu nan situacion bira dje malo cu mester interna nan. 

SCHAAL AF

E momento cu hospital haye den e situacion unda cu tin por lo menos 10 pashent riba piso cu e virus, y cu tin 8 cama di ICU yen cu pashent di e virus, e ora hospital ta schaal af. “Pero nos ta purba tarda e proceso mas largo posible”. Esaki ta tambe debi cu Aruba ta bay haya 6 persona mas di e grupo Mericano di AMI (enfermeronan extra cu ta fortifica e personal local) fuera di e 10 cu tin actualmente. Tin un intensivista y 9 enfermero, di cual nan estadia a keda alarga te otro aña juni. Inicialmente nan contracto lo a vence fin di e luna aki. Fin di otro siman e 6 nobonan ta yega Aruba pa asina yuda na hospital y lo keda te fin di januari di otro aña. Na St Maarten tin tambe como 41 personal di AMI cu si ta necesario, por bin Aruba dentro di 3 dia. Esey ta pone cu e ora por interna mas persona den ICU sin cu mester ‘schaal af’. E hecho cu tin 30 cama menos, ta preocupa e director si un poco. Imsan tin algun cama pero no ta e solucion pa Covid. Esey ta pone cu e unico alternativa ta keda Corsou y Colombia, cu e director ta considera un alternativa hopi importante. Tin e posibildad cu por upgrade tanto cama como personal pa Aruba tin 14 cama operacional di ICU den comienso di 2022, segun e minister di Salud a informa e director. E personal di AMI ta wordo paga (salario) door di Hulanda, y gobierno ta paga e estadia, transporte y cuminda. Hulanda ta paga e ora menos compara cu antes, aunke cu den pasado recien, Hulanda a paga hopi placa na e personal di AMI. Ta mantene 10 cama pa pashent di Covid y 3 pa non Covid, aunke aworaki tin mas hende den ICU cu no tin Covid.