Hulanda ta drenta su di dos lockdown completo diadomingo awor

DEN HAAG – Hulanda ta drenta su di dos lockdown completo entrante diadomingo mainta 5’or, den un intento pa combati e variante nobo di Covid19, esta Omicron. E lockdown aki ta nifica cu tur lugar no esencial ta cera nan porta pa e proximo 4 siman y ta evalua dia 9 di januari 2022 atrobe kico ta kico. Durante un conferencia di prensa diasabra anochi ora di Hulanda, a splica cu e variante nobo ta causando mas problema cu a spera y pa evita un situacion incontrolabel pa fin di aña, a tuma e medida dramatico aki. E variante Omicron ta plamando y pegando hende dos pa tres biaha mas liher cu e otro variantenan. Y esnan cu no a vacuna, tin awor mas chens pa bira malo y drenta hospital. Ademas a mustra tambe cu ta resulta cu e 2 vacunanan di p.e. Pfizer, no ta suficiente y cu mester di e booster shot tambe. Esey a pone cu na comienso di januari 2022 (7 jan 2022), lo habri e posibilidad pa tur hende 18 aña bay ariba, por haya un booster, y ta premira cu kier vacuna 1 miyon persona pa siman. Por lesa tur e reglanan valido entrante mayan mainta. Click AKI.