Campeonato futbol veterano 50+ di FEDEVETA ta inicia diasabra

ORANJESTAD - Diasabra awor 7 maart lo start e Campeonato futbol veterano 50+ di FEDEVETA cu 9 equipo. Riba veld di Britannia pa 6or Arusur/Athletic contra Teachers, pa 7:30 Britannia contra SCA y pa 9or Roma lo enfrenta Inter. Riba veld di Bubali lo start pa 5:30 e wega Bubali contra nacional. E equipo di Santos lo tin un dia di sosiego. Manera tur aña nos lo dedica e Campeonato na 3 persona cu a destaca den e ramo di futbol veterano, nos ta bezig ainda cu e escogencia di e 3 personanan aki cu sigur mas despues lo wordo honra mane debe ser.

E aña aki pa prome biaha lo draai tur 3 campeonato, esta 50+, 40+ y 35+, full apart di otro. Mane 50+ caba lo start ongeveer fin di mei cu 40+ y segun planes na September lo start 35+. Na februari a eligi e directiva nobo di FEDEVETA y nan ta Presidente Sr. Edmund Fraser, Secretario Sr. Franklin Fingal y Tesorero Sr. Randy Tromp. Sigur un cambio cu e directiva nobo kier ta mas informacion pa Publico y asina promove nos dushi futbol veteran, pa es motibo aki nos ta experimentando cu e web-site www.fedeveta.com. Nos ta invita tur hungadornan y fanatico pasa bishita nos web-site y si bo ta desea laga bo comentario. Directiva ta desea tur hungador un dushi campeonato y ta invita Aruba completo bin goza y apoya nos futbol veterano.