Aruba ta riba agenda di Rijks Minister Raad pa trata varios tema

ORANJESTAD – Aruba ta riba agenda di Rijks Minister Raad (RMR) diabierna awor. Esaki a keda confirma pa vocero di ministerio di relacionan di Reino na noticiacla.com diaranson. Ademas prome minister di Aruba tambe a confirma esaki e siman aki durante un reunion parlamentario. Aki lo trata recorte di salario y sosten di likides.

SUGERENCIA

Den e reunion aki lo trata e sosten di likides pa Aruba pa e prome kwartaal di 2022. Tambe e ta un reunion importante pasobra ta bay atende cu e peticion pa ‘bouw af’ recortenan riba salario di empleadonan publico y semi-publico. “E peticion ta pa bouw af, dus no mantene na e nivel ey pero bahe te pa por yega normalidad”, Prome Minister a indica.

NO TA FACIL

Prome Minister a expresa cu e negociacionnan no ta facil. Dialuna ultimo a hiba conbersacionnan extenso riba e COHO, e nota di cambio, e nader rapport. Tur ta riba mesa di deliberacion cu Hulanda. 

OPTIMISTAS

“Gobierno di Aruba ta optimismo cu e Conseho di Minister di diabierna. Algo por cambia di un momento pa otro pero nos ta na mesa ainda. E tema di e protocol ta riba mesa y ainda nos no a sali afor cu un fecha final pa nos por yega toch na e sosten di likides”.