Filanan hopi largo awe atrobe pa ricibi booster shot

ORANJESTAD – Pa di dos dia, ciudadanonan di 55 aña y mas halto a acudi den cantidad grandi pa ricibi nan ‘boostershot’ contra Covid19. E rij prome cu 8’or diaranson mainta tabata literalmente full rond di e edificio di Centro Libertador Betico Croes. E unico problema ta cu hopi tabata di edad, y esey tabata un inconveniencia parando den rij. Di otro banda, una bez cu a cuminsa procesa e fila, esaki tabata bay liher. Ta premira cu awe, lo surpasa e cantidad alcansa di ayera (diamars) di 1323 persona. Y ta evaluando si ta bay prolonga esaki cu mas dia.

SITUACION

E vocero di Departamento di salud Jurrete Croes a duna como tip, pa bin cu stul pa sinta en caso e rij sigui largo. Esaki pasobra cu aunke cu tin tent, e por ta un poco incomodo si mester warda vooral prome cu e centro habri mainta. Fuera di esey, sra Croes ta recomenda pa tur hende bin cu nan health app cla, pa asina por scan e QR code riba dje, y registra mucho mas facil. Tin ta bin cu nan AZV card, pero esey ta dura mas largo. Tur esnan cu para den rij, ta pa haya nan boostershot. E trecker grandi preto di Bureau Rampenbestrijding Aruba (BRA), ta staciona dilanti di e edificio y esey ta solamente pa esnan cu mester haya sea nan prome of di dos vacuna ‘regular’. Pa esaki, ta acepta solamente e health app, segun Croes. Pa esnan interesa pa bin, por haci esaki awe ainda te 4pm y despues mayan diahuebs entre 8’or di mainta pa 4’or di atardi. Un tip ta pa bin prome cu 8’or ya cu for di tempran tin fila di hende.