Ministernan Wever y Croes a sobrevivi mocion di desconfiansa

ORANJESTAD – Tanto prome minister Evelyn Wever Croes como minister Glenbert Croes a sobrevivi un mocion di desconfiansa contra nan respectivamente (presenta pa partidonan AVP, MAS y ACCION21) ya cu e no a haya voto suficiente (9 voto pro y 11 contra cada un) y e gabinete tambe a keda na bida. Ademas e mocion tambe pa para e contracto, no a haya sosten cu ta haci cu e contract tambe ta keda manera cu e ta. Cu esey, a culmina dos dia largo di reunion riba e tema unda cu a nota claramente atrobe cu tabatin un division entre partidonan di coalicion y oposicion, y e biaha aki riba e tema di contracto entre e compania Eagle LNG y WEB. E unico mocion cu a haya sosten, tabata esun cu fraccion di MEP y RAIZ a entrega cu ta pidi mas bien claridad cu cierto accionan cu por tuma pa garantisa un buena marcha di e contenido di e contract cu 11 na fabor y 9 contra.    

MEP 

Partido MEP for di comienso a mustra cu nan tabata sostene e firmamento di e contracto, aunke ningun Parlamentario di e partido MEP a wak e contracto. Inicialmente tabatin algun parlamentario cu a pidi pa un Openbare Bijeenkomst pa asina nan haya mas informacion, y ora cu esaki a cambia den un Openbare vergadering, a cuestiona e motibo di esaki, y a haci nan pregunta respectivo. Na final nan a keda contento y satisfecho cu e forma con cos a bay. 

RAIZDi parti di RAIZ, un peticion pa un reunion cu no a wordo honra inicialmente, a haya forza ora cu siman pasa un carta diripiente a sali como partido, cu sosten di e dos ministernan di e partido, cu nan no ta sostene e firmamento y cu nan lo kier haci un investigacion. E forma con e la keda presenta, tabata como si fuera tabatin un division den e coalicion cu posibel kiebro y bahamento di gobierno. E tension a continua y hopi a premira cu esaki lo por a nifica fin di gabinete Wever Croes II. Ora cu e reunion a inicia diamars riba e di dos dia, a surgi un situacion unda cu mester a suspende e reunion dado momento pa e partidonan den coalicion por a reuni internamente cu otro y wak si nan por haya nan mes. E reunion despues a continua cu e pensamento cu e dos partidonan lo a haya otro. Aki gritonan a cuminsa zona cu partidonan a haya otro y cu esaki ta nifica ‘fin di RAIZ’ ya cu ‘RAIZ lo a dobla’. Den curso di e reunion, tabatin dos momento cu a mustra cu enberdad cos tabata ok atrobe entre e dos partidonan ora cu e miembro Kamperveen su mocion entrega, no tabatin e contenido cu a spera, esta pa para e contracto, sino pa yuda duna informacion den un forma legalmente posibel. Dado momento colega Raymond a kita cualkier duda, unda cu e la bisa cu pa esnan cu a kere cu RAIZ no ta bay sucumbi bou di presion, ni benta gobierno abou pasobra esey ta loke ta biba den cierto hendenan. Cu esaki el a indica cu esey lo pues no sosode. 

AVP, MAS y ACCION21

E partidonan di oposicion no tabatin bon palabra pa e forma con e reunion a bay y tampoco e forma con e miembronan nobo politico, respectivamente RAIZ a anda cu e situacion. A califica esaki como un blind date, unda cu aworaki tur hende a mira cu mientras cu hendenan ta papia di milenials cu ta un cambio politico, a resulta cu e personanan aki no ta di confia y no tin credibilidad. Ademas a keda desapunta cu no a haya e contract pa mira, siendo cu esaki tabata un peticion di e tres fraccionan di oposicion.