Awacero na Aruba a surpasa average di maart caba

ORANJESTAD – Den apenas 24 ora, mas awacero a yobe na Aruba cu sa yobe den henter luna di maart. Segun personal di Meteo di Aruba, e cantidad average pa luna di maart, -climatologicamente un di e lunanan mas seco di aña-, ta 8.7 mm pa henter e luna. Pero den e ultimo 24 ora, Meteo a registra 18.8 mm di awacero. Tin sitionan cu a registra mas manera Ponton, cu a yega te 21.8 mm. “Esaki ta hopi”, sr Lothar Yrausquin di Meteo a sigura NoticiaCla.com awe mainta.

AWACERO

Y for di e pronostico, e awacero lo continua asina te por lo menos diasabra. Durante e ultimo 24 ora, shelo tabata basta sera y a conoce basta momento di yobida fuerte. Esaki a cuminsa ayera den dia y anochi. Pero un biaha mas awe mainta tempran, nos isla a keda bendiciona cu mas palo di awa.

TRAFICO

Problema den tempo di awacero ta cu e ta crea un situacion peligroso riba nos caretera. Varios accidente a keda registra, di cual algun tabata serio, y otronan menos dramatico.

PRONOSTICO

Un disturbio den nivelnan mas halto riba mar atlantico ta genera areanan di humedad y esaki ta biniendo direccion islanan abc, y asina ta responsabel pa mas nubianan y tambe pa algun yobidanan isola.

BIENTO

E biento ta keda fuerte pa e resto di e siman debi na un area di presion halto riba mar atlantico cu ta keda domina. Tene cautela riba lama debi na e biento fuerte.

PROSPECTO

Prospecto di tempo pa e siman: Parcialmente nubla cu algun yobidanan isola. Biento ta keda fuerte. Temperatura ta fluctua rond normal.NOTA. Foto ta di e situacion di tempo di ayera na Aruba.