Lanani: Contracto entre Eagle LNG y WEB mester keda confidencial

ORANJESTAD – E contract entre EAGLE LNG y WEB Aruba NV mester keda ‘confidencial’. Asina e presidente di e compania Mericano Sean Lalani a indica na e periodista Tito Lacle durante e programa Noticiacla LIVE diamars anochi. Ora cu a puntre specificamente si e tin problema pa haci e contract aki publico, su contesta tabata hopi cla: “Nos tin (problema pa expone e contract). Absolutamente!” Lalani a sigui bisa. Y e motibo ta uno puro comercial. Y si e contracto bira publico, esaki tin consecuencia financiero pa nos isla. 

COMPETENCIA

Lalani a splica cu e motibo tras di esaki ta uno comercial. Den e contracto tin hopi informacion confidencial y sensitivo cu ta toca e compania en cuestion. Y siendo un compania internacional, ora cu cierto informacion sali afo, e por afecta e margen di e compania den p.e su forma competitivo financiero. “Nos ta compitiendo activamente internacionalmente den destaho publico unda cu tin competencia” Lalani a bisa. Adicionalmente e ta trece problema entre e compania y otro clientenan cu nan tin y clientenan futuro. “Pesey nos no ta haci nos contractonan publico”. Nan tin contractonan multiple y ta percura pa tur e informacion keda confidencial. Y segun Lalani, mescos ta conta pa WEB cu tambe a comparti informacion sensitivo cu por perhudica e compania tambe. Ni den un forma di ‘ter inzage’, esaki ta algo cu Lalani kier papia ariba. E ta sigura cu e no ta un politico y cu esey por ta algo politico. 

LEAK

Loke tin Lalani preocupa tambe ta e hecho cu den e ultimo 10 dianan, basta informacion sensitivo ‘secreto’ di e contracto a wordo saca afo den varios medionan di comunicacion local. E no sa ken a hacie y esaki ta bira un preocupacion basta serio ora cu papia di duna acceso na mas hende cu tin mester. E ta referi na p.e e posibilidad (riba un pregunta di Lacle) di tin e contracto hasta na bista ‘ter inzage’. Entre e puntonan cu a leak caba, ta p.e e duracion di e contracto di 20 anja. E informacion ey no mester a sali pero a logra keda divulga. 

CONSECUENCIA SI CONTRACTO

Si e contracto keda publico di un forma of otro, e lo tin consecuencia financiero pa e partido cu haci esaki. Lalani a sigura cu mientras cu e no ta un abogado, e sa cu tin un asina yama ‘NDA’ osea un Non Disclosure Agreement cu ta un acuerdo entre e dos partidonan cu no ta divulga nada di e contracto of acuerdo. Violacion di esaki por y lo resulta den un multa of tipo di castigo. Pero Lalani no por a bisa specificamente kico e consecuencianan ta si e contracto wordo publica. 

MINISTER NO TIN CONTRACTO

Cu esaki, por conclui cu e contracto entre WEB y EAGLE LNG lo no bira uno publico nunca, pues cu minister Glenbert Croes lo no haya esaki pa wak y si e wak e mes, e no por publica nada di esaki ni divulga esaki pa Parlamento of un otro persona.