Reunion publico riba contract di LNG por tin sorpresa awe

ORANJESTAD – E reunion publico di Parlamento riba e contracto di gas natural LNG cu ta continua awe mainta despues di a keda posponi dialuna, por resulta den uno hopi interesante, debi na e varios mocionan presenta durante e reunion. Mayoria ta trata mocion di desconfiansa contra por lo menos dos mandatario di e actual gabinete Wever Croes II, respectivamente prome minister Wever y minister Glenbert Croes. Ademas tin un mocion pa para e contracto recien firma. Tur esak ta pone cu tin tension den e gabinete. E portal 24ora a raporta diamars mainta cu un reunion urgente a keda yama pa coalicion, pa trata e situacion y pa sigura cu ora cu e reunion continua, no bin ‘sorpresa’ di parti di partner di coalicion Raiz. Como tal a compronde cu e reunion cu mester a cuminsa pa 9’or awe mainta, a keda hala pa 11’or pa asina duna coalicion chens pa ‘regla asunto interno prome’. 

E REUNION DIALUNA

E reunion dialuna a tuma lugar pero nada concreto no a sali afo mirando cu no a keda cla cu esaki, sino mas bien a duna chens na e protagonistanan pa splica un que otro riba e contracto. Pero, na final, no tabatin contracto presenta, cu a pone cu partido RAIZ ainda a keda cu ‘duda’ riba e acuerdo aki, dificultando nan relacion cu e partner MEP. Di parti di oposicion, partidonan AVP, MAS y ACCION21 no a perde pa mustra nan malcontento politico riba e tema aki, y seyando esaki cu varios mocion, mayoria como uno di ‘desconfiansa’. Pa ley, si Parlamento aproba e respectivo mocionan, e respectivo ministernan mester entrega nan retiro. Keda pendiente pa e resultado di e reunion.