910 cas na Urirama por ta afecta pa molina di biento

ORANJESTAD – Un total di 910 hogar den vecindario di Urirama por wordo afecta pa e parke di molina di biento. E grupo ARU (Affected Residents Urirama)( ta puntra den un comunicado si e grupo aki mester paga e prijs di perde nan salud y valor di nan cas, ademas di costo envolvi ora tuma accion legal pa protehe nan bienestar. Nan ta basa nan mes riba un articulo di Michigan Capitol Confidential unda cu corte na Michigan, USA a dicidi cu Planta di Turbina di Biento Lake Winds na sur di Ludington ta mucho ruidoso.

E caso eynan ta cu Michigan su Corte Circuito 51o situa na Ludington a dicidi cu Mason County tabata hustifica den determina cu turbinanan di biento di Lake Winds Industrial Wind Plant banda di Ludington ta mucho ruidoso. Hues Richard Cooper dia 16 di juni a dicidi di nenga Consumer Energy su apelacion pa e corte anula e municipio su hayazgonan cu e planta di biento tabata surpasa e limitenan di nivel di decibel estableci pa e municipio Cu un splicacion hopi tecnico, Hues Cooper a bisa cu ta rasonabel cu e municipio ta tuma na cuenta e impacto di e velocidad maximo di biento cu no ta fuera di norma. Tambe el a rechasa e argumento pa permiti e nivelnan escesivo di ruido pa sosode solamente durante cierto periodo di tempo.

Residentenan cu ta biba serca di e planta di $255miyon,  cu ta consisti di 56 turbina, ta experencia problemanan di salud corto despues cu e turbinanan a cuminsa opera. Nan a entrega un demanda legal (lawsuit) 1 di april 2013, cu ruido, vibracion y lusnan cu ta sende paga di e planta tabata afecta nan salud. Entre e sintomanan nausea, cu nan no por drumi y dolor di cabez. Tur esakinan ta algun di sintomanan comun di Sindrome di Turbina di Biento documenta pa  Dr. Nina Pierpont.

ARU (Affected Residents Urirama)  tambe a laga haci estudionan independiente di ruido pa asina comproba cu e midinan di biento cu a wordo tuma pa e desaroyador di e proyecto no ta corecto! Robert Rand miembro di INCE “Institute of Noise Control Engineering” a entrega su carta di alerta na Prome Minister Eman dia 29 di October 2012 y e Miembronan di Parlamento dia 1 di November 2012.

Kevon Martis ta declara cu sucedido na Mason County mester ta un alerta cu tin un prijs pa paga pa ignora sciencia acustico claro cu ta predeci desaster social, hopi antes cu e prome shovel di tera wordo bira. Como tal e pregunta ta keda si na Aruba, 910 hogar den vecindario di Urirama mester paga e prijs di perde nan salud y valor di nan cas, ademas di costo envolvi ora tuma accion legal pa protehe nan bienestar, segun ARU.