Dialogo social di Aruba propaga durante ILO na Bahamas

NASSAU - Minister di Labor Paul Croes durante su intervencionnan den e Conferencia di ILO “International Labor Organization” a mustra riba e importancia cu Dialogo Social tabatin pa nos pais. Tin un total di 14 minister di labor procedente di paisnan den Caribe y 21 delegacion en total cu ta forma parti na e di nuebe Conferencia cu ta tumando luga na Nassau, Bahamas. Y den cuadro di esaki, Croes tabata den representacion di Aruba.

TOPICONAN

Varios topico di interes riba desempleo di hobennan, desigualdad di hende muhe riba e mercado laboral, importancia di Dialogo Social y seguridad di trabou ta wordo discuti den e reunion aki. Un proceso cu ta wordo carga pa Prome Minister di nos Pais. "Na momento di tuma desisionnan cu tin impacto nacional ta importante pa scucha y tene na cuenta opinion di e partnernan social. Na Aruba varios reformanan social importante a tuma luga y danki na e proceso di dialogo social esakinan a bai relativamente den un ambiente hopi profesional. Otro paisnan a conoce desaroyonan distinto y esaki no ta contribui na stabilidad economico y un bon Clima di inversion", Croes a mustra.

ILO

E di 9 conferencia aki di ILO ta un conferencia cu ta reuni practicamente tur Ministernan di Labor di Region Caribense y Suriname. Minister Paul Croes a reuni cu representantenan di ILO y tambe cu varios Ministernan di Labor di e region, unda na Juni venidero, lo yega na un acuerdo concreto di apoyo tecnico y di programanan pa hubentud y productividad.