Yiu a tira y hinca su tata mata na su cas na Rooi Bosal

ORANJESTAD – Un homber a hinca y tira su tata mata dialuna marduga na Rooi Bosal. Vocero di polis Lito Lacle a confirma cu pa 2’or na e sitio, melding a drenta di e caso. Polis a mobilisa pa e sitio unda cu enberdad testigonan na e cas a informa cu un yiu, Jason M bibando na e apartamento na e cas, lo tabatin un discusion cu e tata y a a tira y hinca su tata y despues hib’e hospital. Pa 2’or y 25 docter a constata morto di e tata  Eugenio Mathilda di 54 anja di edad. Na Hospital a detene e yiu mesora. E ta un conocido di polis segun vocero di polis. Ta buscando e arma di candela cu cual a tira e tata mata.  Segun Lacle, ta buscando e ‘schiethand’ di e sospechoso pa confirma e parti di tiramento. Pero na e sitio, e vocero a confirma cu e yiu a tira y despues hinca e tata, cu resultado fatal. Mientras cu aparentemente e yiu ta desmenti cu e ta e culpabel, vocero di polis a mustra cu nan ta kere e famia y testigonan cu a papia cu polis. Pero investigacion lo determina finalmente kico a sosode. A compronde cu a confisca e auto tambe cu cual a transporta e tata pa hospital.