Gobierno a nombra dos director pa Colegio EPI

ORANJESTAD - Despues di un procedura largo y intensivo Colegio EPI awo conoce su directiva nobo. Minister Hooyboer-Winklaar a opta pa nombra tanto un Algemeen Directeur como un Directeur Bedrijfsvoering pa Colegio EPI. Martin Richardson a keda nombra como Algemeen Directeur, mientras cu Angelique (Ankie) Danker a keda nombra como Directeur Bedrijfsvoering. Ambos miembro nobo di directiva tin experencia amplio den posicionnan di maneho y coordinacion den enseñansa y den sector priva. Minister Hooyboer-Winklaar ta mira cu Colegio EPI ta drentando den un era nobo cu diferente cambionan ambos na nivel di e organisacion como tambe den e estudionan cu Colegio EPI ta ofrece.

 RICHARDSON

Martin Richardson,un Arubiano biba pa hopi aña na Hulanda, ta entre otro docente di Biologie y Scheikunde cu a profundisa su mes despues den “Mens en Arbeid”. Ademas e no ta un persona desconoci pa loke ta maneho di organisacionnan di enseñansa manera Colegio EPI. Awe EPI ta conta cu mas of menos 1700 studiante reparti den di 4 unidad; unidad di Economia, unidad di Ciencia y Tecnologia, unidad di Salubridad y Servicio y unidad di Hospitalidad y Turismo. EPI den totaal ta conta cu 136 docente y 53 personal di sosten. Actualmente EPI ta e scol di mas grandi di Aruba pero si compara cu e grandura di scolnan MBO na entre otro Hulanda ainda EPI ta relativamente chikito. Sr. Richardson ta indica cu den pasado e a fungi varios aña como kwaliteitszorgmanager den e College van Bestuur  di ROC Amsterdam cu no menos di 40.000 alumno y 3000 docente. Aunke e grandura ta un diferencia esaki no ta kita cu EPI ta confronta hopi di e mesun retonan cu cualkier otro MBO na Hulanda of den resto di reino. Tambe Martin Richardson a traha pa varios aña den “Management begeleiding” y “Arbeidsvoorziening” na Sociale Zaken na Hulanda cu tambe tin hopi di haber cu enseñansa, debi cu semper tin personanan cu dificultad pa reintegra den enseñansa of sector laboral despues di a pasa den problemanan di bida. Internacionalmente Martin Richardson a yuda hobennan ubica nan interesnan den e enseñansa cu miho ta bay cu nan persona. A coordina entre Turkia y Hulanda e proposicion pa cambionan den ubicacion di studiantenan. Tambe a participa activamente den e organisacion di e celebracion di 400 aña di relacion economico entre Reino Hulandes y Turkia. “Aruba semper a keda mi prioridad, y mi a trata di haya e experiencia pa un dia uza esaki na mi isla, pa mi comunidad” e director nobo di EPI a bisa. Na momento cu e puesto di Director a bira vacante, Angelique Danker, Directeur Bedrijfsvoering  a sa di fungi como Director suplente y a haci esaki hunto cu e unit managers y afdelingshoofden di EPI