Sarah-Quita Offringa ta e Personahe di Aña 2021 di Noticiacla!

ORANJESTAD – Despues di evaluacion den seno di Noticiacla y Wired Media, gerencia a dicidi cu pa e aña aki, ta nombra e deportista local femenino Sarah-Quita Offringa como e Personahe di Aña di Noticiacla pa 2021. Y esaki ta bay mas bien pa su continuo y consistente prestacion Deportivo riba tereno internacional, poniendo Aruba su nomber riba mapa continuamente. E aña aki no tabatin mucho accion p’e, pero asina mes e poco cu tabatin atrobe e la sa di mustra su dominio riba e dos disciplinanan di e deporte di Windsurfing, terminando atrobe como e number 1 di mundo den parti femenino pa di 18 y 19 biaha den respectivo disciplinanan. Loke ta hala atencion di Noticiacla tambe ta e hecho cu na cada ocacion cu e haya, e ta luci e bandera di Aruba y no ta sconde e hecho di unda e ta bin. Sea ta un bandera chikito, uno grandi, semper e tin e bandera y ta promove Aruba literalmente rond di mundo. 

Recientemente durante un programa di Noticiacla LIVE, Sarah Quita a comparti su bida cu nos, unda cu aki a resalta atrobe su deseo ferviente di comparti su experiencia cu nos hubentud, pa nan tambe logra loke e la logra. Un berdadero ehempel pa hubentud, unda cu e la sa di termina su estudio completo, y despues sigui cu e loke mas e ta gusta. Actualmente e ta preparando pa atrobe yuda muchanan na Aruba cu e deporte aki. Y su deseo ta pa otro aña trece e competencia mundial pa Aruba un biaha mas. Y nos ta spera cu realmente, e logra esaki y cu tur esnan cu mester yuda, sa di haci esaki tambe. Pa tur e loke a keda menciona aki riba, Noticiacla ta sinti cu ta mas cu claro cu e mester bira nos Personahe di Aña. E ta un deportista cu ainda no a haya su atencion debido, manera e merece, y nos ta spera cu esaki por ‘jumpstart’, un serie di atencion, culminando cu Aruba reconociendo e atleta internacional aki, cu tanto stima su isla. Sarah-Quita, Pabien!!