Otro siman ta divulga ‘feitenonderzoek’ riba hedging

ORANJESTAD – Otro siman e resultado di e ‘feitenonderzoek’ di e hedging contracts di WEB ta bira conoci. Specificamente dia 12 di maart pa 10’or di mainta ora e reunion publico di parlamento riba e tema tuma lugar. Durante e reunion aki, minister di energia Mike de Meza lo mester presenta e resultado, y hunto cune un splicacion di kico tur e rapport ta contene. Presidente di parlamento Marisol Lopez Tromp a confirma awe merdia cu e fecha ta stipula y cu e invitacion pa e reunion ta afo.

SPLICACION

Durante e reunion aki, de Meza lo mester splica kico a conduci cu a opta pa un hedging contract di 3 aña y di 90 pa 95% total di hedging. Esaki pasobra e ta algo in usual pa haci, cu ta e motibo real pakico a pidi pa haci un ‘feitenonderzoek’ pa haya sa mas informacion. Y tambe lo mester sali na cla si e contract(nan) lo por wordo kibra. Y si por kibra esaki, cuanto e lo sali na multa si esey ta e caso.

RAPPORT

Algun siman minister de Meza a confirma na NoticiaCla.com cu e rapport ta cla y cu e mester a repasa esaki ainda. Despues di e siman a bolbe puntra e mandatario riba e rapport. Eynan e la bisa cu e la mira e rapport y cu tin indicacion cu e no por kibra esaki sin mas. Y cu si tabata na dje, e lo a haci’e diferente. Y cu e lo presenta esaki den parlamento pa asina haci’e publico y pa tur hende mira kico ta den e rapport.