Conocido ex sub inspector di polis Ivan Kelie Sr a bay sosega awe mainta

ORANJESTAD – Awe mainta na edad di 89 aña conocido ex polis Ivan Kelie Sr a bay sosega, despues di un enfermedad largo. E ta tata di e conocido personalidad radial y ultimo tempo tambe di television, Ivan Kelie Jr. Sr Kelie Sr  a bin Aruba na 1958 despues cu e la gradua como polis na Corsou y a bin Aruba pa traha pa mas di 25 aña como polis  unda cu e la yega te rango cu e la gradua como onder inspecteur. Den su trayectoria como polis tabata lidera e organisacion di IPA cu ta para pa International Police Asociation caminda na varios ocacion a sa di hiba e nomber y bandera di Aruba internationalmente. Despues di a baha cu VUT a sigui den mundo di seguridad na Hotel pa algun añanan mas. Su deporte di alma tabata tiro y a representa Aruba na varios ocacion na competencianan international y a fungi pa hopi aña como instructor di e deporte di tiro. E ta tambe un di e pilarnan den lantamento di e club di polis POVA. Pa su ultimo añanan di bida e la sufri pa hopi tempo cu problema di curazon te awo cu finalmente Dios a tume den su Reino. Ivan Kelie Sr ta laga atras su dos yiu hombernan Ivan Jr y Michael. Noticiacla ta manda palabra di profundo pesame, y cu Ivan Sr sosega na paz.