RAIZ na MEP: No ta sostene e acuerdo entre EAGLE LNG y WEB

ORANJESTAD – Ta parce cu e prome senjal di un crisis di coalicion ta a punto di cuminsa. Esaki pasobra un comunicado diahuebs anochi di Partido RAIZ ta bisa cu e  no ta sostene e acuerdo entre EAGLE LNG y Web Aruba NV. Den un comunicado cu e noticiacla tin den su poder, ta mustra cu ministernan Ursell Arends y Geoffrey Wever hunto cu Parlamentarionan Raymond Kamperveen y Raymichelline Raymond a informa cu nan ‘no ta comparti e decision di a firma e acuerdo’.  Segun e partido, nan a informa nan partner den coalicion basta siman atras caba, cu nan no ta di acuerdo cu e contract cu LNG, sigur no uno cu ta di 20 anja pa fossil fuel. 

TRANSPARENCIA

Ademas a mustra cu no tabatin transparencia con e procedura a bay y cu no tin garantia pa haci e transicion pa Hydrogen den un termino corto como fuente di energia moderno. 

INCOMPRENDIBEL

“Nos no por compronde con un identidad estatal ta bay firma un acuerdo di 20 anja cu tin efecto pa full e comunidad di Aruba, sin cu a aproba esaki den Conseho di Minister, y sin cu e minister di Energia a bay Parlamento di Aruba pa duna un splicacion y verifica cu Parlamento di Aruba ta aproba un contract di asina un embergadura” e comunicado ta sigui bisa. 

RAIZ a mustra cu nan ta boga pa Hydrogen y esey lo a wordo aproba tambe entre RAIZ y MEP den e plan di gobernacion 2021-2025. Ta considera como tal cu esaki ta linja recta contra e pensamento aki. 

POSPONE FIRMAMENTO

Nan ta mustra tambe cu unanimamente e partido(RAIZ) a dicidi cu e firmamento di contract mester wordo posponi te ora un investigacion profundo tuma lugar pa asina sigura cu e proceso a wordo dirigi corectamente y cu e ciudadanonan di Pais Aruba no ta wordo perhudica. 

FIRMAMENTO

A compronde di e comunicado cu ora cu RAIZ a informa minister Glenbert Croes pa pospone e firmamento, Croes a contesta cu e contract tabata firma caba y cu e ‘signing ceremony’ ta simbolico. 

INVESTIGACION

Segun e comunicado, a pidi un investigacion aworaki pa wak kico ta sali afo y despues lo tuma e siguiente decision.

REACCION MINISTER

Den un reaccion breve di minister Geoffrey Wever awe nochi ainda pa e portal aki, e la confirma e contenido di e comunicado aki, pero no kier a referi back na e comunicado aki.