Nos aeropuerto ta den proceso di inspeccion rigoroso aworaki

ORANJESTAD – Aeropuerto di Aruba actualmente ta bou di inspeccion rigoroso, pa un team di experto guia pa ACI (Airports Council International). NoticiaCla.com a tuma nota di e investigacion aki, ora cu nan a yega e.o. pa inspecciona e parti di bombero. Aki a bay busca mas informacion y a resulta cu esaki ta den cuadro di preparacion cu nos aeropuerto ta pasando aden pa por haya su certificacion oficial door di Departamento di Aviacion Civil. E meta ta pa confirma si aeropuerto ta cumpliendo cu e reglanan di seguridad internacional. E team di auditorio tin representante di diferente aeropuerto manera Quito, Montevideo, Ottawa, y tambe e Rescue y Fire Fighting Captain di Miami Dade Airport. Semper den e inspeccionnan aki ta wordo conseha na e aeropuerto unda e por mehora pa e por cumpli cu tur exigencia stipula.

APEX

NoticiaCla.com a compronde cu e programa aki (Airports in Excellence APEX) a inicia un par di aña pasa pa duna asistencia y guia na aeropuertonan rond mundo y prepara nan pa hisa nan nivel. E bishita ta dura e siman aki , pa despues nan traha un rapport y despues hunto cu aeropuerto, nan traha un plan di implementacion cu lo wordo monitoria pa Departamento di Aviacion Civil.