Sindicatonan ta demanda contesta di gobierno mas tarda diabierna merdia

ORANJESTAD – E 13 sindicatonan cu a organiza e dia di accion diaranson, awor a duna gobierno ultimatum pa diabierna merdia awor. “Nos ta demanda gobierno pa un contesta pa mas tarda mayan diabierna 12or. Dependiendo di e contesta di gobierno lo comunica mayan mes ora kiko e proximo pasonan lo ta den e dianan venidero” nan a manda bisa nan miembronan den un comunicado diahuebs, cu e portal aki tin den su poder. 

DELIBERA

E sindicatonan a informa cu nan a delibera diahuebs despues di e dia di accion na sede di SIMAR riba e malcontento di tur miembro di sindicatonan y tambe riba un strategia tocante e recorte di 12.6%. “Awe a manda un carta habri como contesta riba nan posicion di cueste loke cueste, esta, ignorando tur manifestacion di malcontento kier dal bai y sinta cu algun sindicato minoritario y cu di comienzo no tabatin problema pa e recorte di 12.6% keda” e comunicado ta sigui bisa. Nan ta pidi pa keda pendiente pa lugar y orario cu lo wordo anuncia diabierna si no haya contesta positivo.