Patrick Kluivert ta entrenador pa ekipo nacional di futbol di Corsou

WILLEMSTAD – Despues di varios dia di speculacion, ta confirma cu e ex hungador profesional di futbol Patrick Kluivert (38) a firma y keda apunta como e entrenador oficial di e ekipo nacional di futbol di Corsou. E la firma, a biaha y ta wordo presenta na publico mayan na Corsou.

CUALIFICACION

Un di e tareanan cu Kluivert a haya di su ‘hefenan nobo’, ta cu Corsou mester cualifica pa e copa mundial di futbol di 2018 na Rusia. Entre 2012 y 2014, Kluivert a fungi como e asistente entrenador di e ekipo nacional di Hulanda, cu tabatin Louis van Gaal como e entrenador. Prome cu esey, e tabata entrenador asistent caba pa FC Twente, NEC, PSV y AZ.

ELIMINACION 

E ekipo nacional di Corsou ta existi for di 2010, ora cu Antiyas a keda desmantela na october di e aña ey. E ekipo no a logra clasifica pa e copa mundial 2014, pero si a participa e mesun anan na e Copa Caribe. Eynan e la termina na ultimo lugar den grupo di Trinidad, Cuba y Guyana Frances.

PROME PARTIDO 

Kluivert no tin mucho tempo, ya cu e prome partido cu e tin cu dirigi como entrenador di Corsou, ta fin di e luna aki contra Montserrat. E ta e prome wega di clasificacion pa e mundial di 2018.