Tiara Air trahando pa sali di proteccion di pago actual

ORANJESTAD – Manera ta conoci, e operacion di Tiara Air a wordo afecta door e tardansa di aprobacion pa cambio di Bolivar Venezolano na US dollars. Tiara Air a re-organisa e compania durante e temporada di paro y awor ta hasiendo preparacion necesario pa brinda servicio aereo atrobe, cu un strategia menos dependiente di e benta di Bolivar Venezolano.

AOC

Mientras cu Tiara Air no tin fecha ainda pa cuminsa bula, e managing director Alejandro Muyale a confirma na NoticiaCla.com awe cu e proximo simannan lo e participa e fecha di comienso y e rutanan cu lo cuminsa bula. Asina e ta confirma e noticia cu nos a publica e siman aki di Tiara Air. Esaki ta unda cu nos a informa cu recientemente Tiara Air a logra completa renobacion di su Air Operator Certificate (AOC). Cu e AOC, Tiara Air ta preparando pa cuminsa cu buelonan atrobe despues di un temporada di paro di operacion di mas o menos nuebe luna di e aerolinea.

PLAN DI PAGO

Tiara Air tambe ta trahando riba e plan di pago pa cu su creditornan, bow di e supervision di e administrador apunta door di corte di Aruba. Una vez e plan aki keda acorda den reunion cu su creditornan, Tiara lo sali for di e proteccion di pago actual.

GRADICIMENTO

Tiara Air su Managing Director, Alejandro Muyale, ta sumamente orguyoso di y gradicido na tur empleado cu na un manera of otro a duna nan apoyo na e aerolinea Arubiano. Tambe Tiara kier gradici tur creditor y instancianan concerni cu a mantene nan sosten y cooperacion durante e reto grandi cu nan e enfrenta e ultimo para di lunanan.