Croes: Diahuebs WEB ta firma acuerdo cu EAGLE LNG pa suministro di gas

ORANJESTAD – Diahuebs awor e compania EAGLE LNG y WEB ta firma e acuerdo pa un planta di suministracion di Gas LNG cu lo ta ubica riba tereno di Refineria di Aruba. Asina minister di energia Glenbert Croes a confirma diamars atardi durante un conferencia di prensa.  “Gobierno di Aruba ta endorsa e proyecto aki”, e mandatario a sigura un y tur den e conferencia. E intencion ta cu e firmamento aki, pa 2024 pone un fin na e uso di Heavy Fuel Oil cu ta wordo usa aworaki na WEB pa operacion di e boilernan na WEB. E intencion ta tambe pa Eagle LNG mes financia e planta su construccion cu ta un inversion di 110 miyon dollar Mericano. Entre e construccion y operacion di e planta, esaki lo genera como 200 cupo di trabou segun e mandatario a sigura tambe durante e conferencia di prensa. 

LIMPI

E intencion ta pa dado momento reduci e emision di carbon cu por lo menos 30% y pa aki par di anja esaki ta ya na 45 pa 50%. 

PREGUNTANAN

Prome cu e conferencia, ya tabata surgi varios pregunta manera e seguridad di e operacion, usando pipa riba tera pa transporta e gas for di RDA (San Nicolas) pa WE (Balashi), den caso di un leak cu por causa un explosion. Aki e mandatario a bisa cu a haya siguransa di e operadornan cu tanten cu no tin mechanismo di seguridad na luga, no ta firma nada. E financiamento tambe ta keda un pregunta unda cu mester sa si e placa menciona di inversion, lo bin di parti di EAGLE LNG mes of si esaki tin cu wordo fia ainda pa e compania Mericano. Loke tambe no a haya contesta, ta pakico no tin un transparencia di documento manera cu ta tuma lugar otro caminda, ora cu ta trata un compania publico. E mandatario no por a duna un contesta concreto, pakico esaki ta e caso, pero a ‘priminti’, cu tur loke e pidi y por haya, e lo suministra na Parlamento y consecuentemente cu prensa y pueblo tambe por haya.  

E HISTORIA

Un di e obhetivonan pa logra WEB Aruba su vision di yega na un produccion ‘Cleaner, Greener and Fuel Oil Free’ ta pa elimina por completo e uzo di Heavy Fuel Oil (HFO) como fuente di energia. Asina e compania ta bisa den un comunicado. Mescos cu tempo di introduccion di tecnicanan manera SWRO y energia di biento y solo, un biaha mas WEB Aruba tin cu para keto y evalua kico ta e mihor desicion pa logra e obhetivo na beneficio di Pais, comunidad y WEB Aruba. Pa kita tur incertidumbre y pa tuma un decision responsabel, gerencia di WEB Aruba desde 2017 a forma un programa pa studia tur posibilidad, riesgo y paso cu mester tuma pa introduci cambionan exitosamente. Considerando e actual desaroyo di Gobierno di Aruba pa negocia construccion di un terminal pa distribucion di LNG cu e compania Eagle LNG, WEB Aruba a dicidi di pone un paro na su programa di sondeo pa introduci LNG. Gerencia di WEB Aruba awo lo bay inicia e proceso di exploracion di e posibilidadnan di adkiri gas pa WEB Aruba cu e compania Eagle LNG. Lo sondea den ki forma y na ki prijs por cumpra LNG pa uzo di e gas den planta. 

INFLUENCIA Y PROTEHA PRODUCTO

No ta por nada a formula e obhetivo pa elimina por completo e HFO como fuente di energia pa produccion di electricidad. E obhetivo ta pa influencia e producto y prijs cu WEB Aruba ta ofrece, cu e meta pa keda competitivo pa clientenan. P’esey WEB Aruba su team di diferente expertisio, a bin ta coordina sondeonan pa adkiri gas natural y converti e proceso di produccion di coriente pa opera riba gas. E sondeonan tawata hopi amplio y no solamente a enfoca riba e parti tecnico, financiero y huridico, pero tambe riba ki impacto cambionan grandi asina ta trece pa WEB Aruba su forma di operacion. 

Prome cu a tuma cualke decision, a delibera cu tur stakeholder, esta cu accionista, cu staff, sindicato, empleadonan, y last but not least, cu representantenan di cliente y otro gremionan externo. A haci e sondeonan segun un programa reconoci internacionalmente cu ta coordina, dirigi y premira implementacion di un set di proyecto relata na otro y actividadnan pa logra resultado y beneficio relaciona cu e obhetivo strategico di elimina HFO for di WEB Aruba su produccion. A pasa fasenan di inventarisacion di informacion di entre otro bendedornan di gas natural y companianan di utilidad cu ta traha cu gas caba pa asina haña un idea kico ta e consecuencianan pa tur envolvi.