Turista cu a test positivo pa Covid na Aruba, a compara su isolacion cu un prizon

ORANJESTAD – Un turista cu a test positivo pa Covid19 momento cu e tabata bandona Aruba recientemente na augustus di e aña aki, a compara su periodo di isolacion cu un prizon. E no a keda contento y a raporta esaki na medionan Mericano recientemente. E turista identifica como Rich Richards di e estado di Connecticut, ta bisa cu na fin di su vacacion na Aruba, el a test positivo saliendo for di Aruba, cu a pone cu e no por a biaha y cu e mester a bay den cuarentena pa un siman. Algo cu e no a aprecia. 

E TRATO

E trato cu e la haya, e no a aprecia y a compara e siman ey como un prizon. “Mi a sinti cu mi tabata den prizon pasobra mi no por a haci nada, te ora cu nan bisami kico mi por a haci”. E ta completamente vacuna, y asina mes e la test positivo ora cu e kier a bandona Aruba. Segun Richardson, e mester a keda den un facilidad unda cu e doño tabata check cada ora, si e y su famia tabata presente. Mirando su experiencia, e la dicidi cu pa por lo menos un aña, e no ta biaha y ta prefera keda cas.

TEST LOCALMENTE

Manera ta conoci, tur Mericano cu biaha bek pa Merca awor, ta wordo exigi pa ta vacuna y tin cu test prome cu nan biaha. Y si nan wordo haya positivo, nan tin cu bay den isolacion pa un periodo. Esaki ta wordo cubri pa e seguro cu e turista ta obliga pa cera ora cu e biaha pa Aruba. E facilidad unda cu e turista ta keda, no ta keda publica pero ta un facilidad cu no ta un hotel, sino un lugar aparta aproba pa Crisis Team.