ORANJESTAD – Tin un division entre trahadonan di sector publico na Aruba cu a participa na e reciente encuesta di NOTICIACLA, riba e recorte salarial di 12.6%. Siman pasa NOTICIACLA a presenta un encuesta basa riba e tema aki, y a resulta cu di esnan cu a participa, 46% kier pa gobierno continua cu e recorte, mientras cu 54% kier pa gobierno para cu esaki mesora. Ademas, di esnan cu a perde trabou debi na e pandemia, 48% ainda ta sin trabou. Un total di 347 persona a participa na e encuesta digital aki.
META DI E ENCUESTA
Den e encuesta aki, e intencion tabata pa fula tera riba e situacion laboral na Aruba relaciona cu e pandemia di Covid19. A fula tera riba cuanto hende a keda afecta, sea cu si nan a perde trabou, corta den salario y con nan ta manehando esaki. Y aki tabatin resultadonan hopi interesante cu a keda presenta.
RESULTADO
Entre esnan cu a participa, 78% a confirma cu nan ta forma parti di e forza laboral di Aruba. Y for di esnan cu ta participa na e forza laboral, 67% ta den sector priva y 33% ta den sector publico. Y di esnan cu ta forma parti di e forza laboral, 12% a indica cu nan perde nan trabou y 88% a mantene nan trabou. Tin tambe esnan cu a keda cu nan trabou, pero 67% a indica cu nan a perde parti di nan salario, y 33% no. Den sector priva, e porcenta cu mas a wordo perdi na salario ta 20% y esaki ta un grupo di 16%.
TRAHADONAN PUBLICO CU A ENTREGA
Un grupo grandi di esnan cu a participa den e encuesta y cu a indica cu nan ta traha den sector publico, a confirma cu nan mester a entrega 12.6% di nan salario. Aki ta resalta tambe cu enberdad no ta tur trahado den sector publico mester a entrega 12.6%, pero e grupo aki ta mas chikito entre esnan cu a participa na e encuesta (7%).
KICO PA HACI CU 12.6%
Riba e pregunta entre esnan cu a participa na e encuesta, y cu ta trahado publico, kico mester haci cu e recorte, 46% a bisa cu mester continua cu esaki pasobra Hulanda tin e como condicion pa sigui yuda cu fondo. E otro parti, 54% a bisa cu nan kier pa para esaki mesora, aunke cu Hulanda tin e como condicion pa sigui yuda cu e fondo. Ora cu a puntra esnan cu kier pa para esaki mesora, a duna nan 5 opcion kico nan ta kere cu mester haci e ora. Aki 47% a scohe pa e opcion pa ‘kita trahado pa baha gasto di salario envez di baha salario’. E siguiente opcion mas popular tabata e opcion ‘otro’, (36%), sigui pa 11% cu ta scohe pa tur opcion ta bon, mientras cu 6% a scoge pa ‘hisa mas impuesto pa henter pueblo y turista’.
DESEMPLEA
Di e grupo cu a perde trabou durante e pandemia, 48% ainda ta sin trabou, 30% ta bek na trabou, mientras cu 23% ta trahando bek pero no ta na 100% ainda.
SALARIO
Un grupo di 56% cu a participa, ainda nan salario ta afecta pa e pandemia, esta cu e no ta 100% ainda, mientras cu 44% nan salario ta bek na normalidad.
DISCAIMER
Noticiacla manera semper, no ta pretende cu su encuestanan ta representa henter e isla, ni cu tur hende tabatin acceso, mirando cu esaki tabata un encuesta electronico, pues cu no tur hende tin acceso na esaki. Asina mes, e ta un indicacion interesante entre usuarionan di Noticiacla y ta genera material suficiente pa tene na consideracion.
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.