“Extraordinary Women Conference 2014” lo contribui na crecemento intelectual di lidernan femenino

ORANJESTAD - Dia 26 di September proximo Elever, conhuntamente cu ‘At your Service Events and Beyond’ ta trece pa e publico femenino di Aruba un conferencia fenomenal titula ‘Extraordinary Women’s Conference’. Enfoke di e conferencia aki ta pa contribui na e crecemento intelectual di e lidernan femenino di awe y mañan. E mision di e conferencia ta pa presenta y promove un comunidad genero inteligente “Gender Intelligent” y trata di aplica e diferencianan entre hende homber y hende muhe, pero tambe diferencianan cultural na beneficio di cada persona, compania of pais.

Den varios conferencia y seminario por a tuma nota di kico ta e diferencianan den liderazgo di hende homber y hende muhe. Pero awo cu nos tin tur e informacion ey y sa kico ta e diferencia, con nos ta aplica esaki y lag’e beneficia nos mes, nos compania y nos pais? Tambe lo toca e tema di diferencia cultural. Aruba ta un pais cu un rikesa grandi den diferencia cultural. Con nos companianan local y nos pais por beneficia di diferencianan aki? Tur esaki lo wordo presenta na e oradornan durante e Extraordinary Women’s Conference.

Extraordinary Women’s Conference orguyosamente ta presenta Alicia Wagner, certified Coach y Facilitator na Ohio, USA. Alicia Wagner lo facilita un mini workshop interactivo durante e conferencia caminda cu e lo encurasha tur presente pa pone un spiel nan dilanti y cera conoci cu bo mes di nobo. Alicia lo enfoca tambe ariba e cualidadnan di liderazgo cu e ser femenino tin. Yolanda Lee-Conyers ta Vice Presidente Global di HR Operations y Chief Diversity Officer di China su ‘technology giant’ Lenovo. Yolanda Lee-Conyers lo comparti su experencia ariba ‘cultural and gender diversity’ y riba e balans den trabou y bida priva.

Lo cera e conferencia cu presentacion di Gina Barreca, autor, humorista y profesor di Ingles y teoria feminista na Universidad di Connecticut. E lo comparti e mensahe di “Gender Intelligence” den un forma academico combina cu humor. Durante e conferencia lo haci entrega di e galardon “Extraordinary Women Award” na un dama extraordinario local. Tambe lo tin un panel mixto di e oradornan internacional y damanan local cu lo dialoga riba e diversividad na Aruba. Aruba en general muy en particula e damanan extraordinario ta keda cordialmente invita pa e gran conferencia aki dia 26 di september 2014 den O Restaurant na Paseo Herencia cuminsando di 8or di mainta pa 5or di atardi. “Like” e pagina di e conferencia aki riba www.facebook.com/extraordinarywomenaruba y mantene bo mes informa di tur acontecimento rond di e conferencia y cu chens di gana un ticket di entrada.