Impasse entre Humphrey Davelaar y Earl Balborda ta continua

WILLEMSTAD – E impasse entre lider politico di partido Nashonal Humphrey Davelaar y minister pa e partido berde, Earl Balborda ta sigui awe. Ayera den un entrevista cu Telecuracao, Balborda a sigui insisti cu e no sa di nada. Mes momento e ta bisa cu e la busca contacto cu Davelaar pa haya un aclareacion. Pero e no tabata exitoso den esaki. Mes momento ayera nochi, e prome impresion di un reunion di e partido, a indica cu nan ta sigui sostene Balborda.

PREPARA OTRO PERSONA

Mes momento a cuminsa prepara un otro candidato pa reemplaza Balborda, encaso e baha como minister. Segun informacion di fuentenan di NoticiaCla.com na Corsou, lo ta preparando Caresse Peternella pa bira minister “si e gabinete actual sobrebibi e crisis grandi den PNP”. Peternella ta yiu di baluarte di partido Lelia Peternella-Pieters-Kwiers. Te cu awe mainta sinembargo, no tin nada oficial. Loke ta sigur, ta cu tin un desacuerdo interno con pa atende e asunto.

DESCONFIANSA

Lider di partido berde Nashonal di Corsou, Humphrey Davelaar a informa partidonan di coalicion dialuna cu e no tin confiansa mas den Earl Balborda komo minister, (cu ta representa su partido). Davelaar mientrastanto a bai informa partido di su desishon. No ta conoci si esaki ta nifica cu Balborda tin cu bandona partido of si Davelaar lo mester asumi responsabilidad. Fuente:  Mariano Heyden y Yves Cooper.