Allianze Partners: Aruba ta den top 5 destinacion pa Mericanonan biaha e luna aki

MIAMI – Fuera di Mexico y Jamaica, Aruba ta e destinacion mas popular pa Mericanonan biaha e winter aki, unda cu segun e portal di Allianze Partners USA, tin un aumento di 34% di biahe di Mericanonan den e proximo 3 simanan, compara cu 2020. Aruba ta den e top 5 di destinacionan internacional, technicamente na di 5 lugar (den top 10), pero den practica, na di 3 lugar, si tene cuenta cu e prome tres lugarnan ta destinacionan tur ubica na Mexico, sigui pa Jamaica. Aruba ta prome cu London, Bahamas, Republica Dominicana, Turks & Caicos, y hasta Paris. Pues un grupo basta privilegia. 

ITINERARIO

Segun e portal su investigacion, a analisa 4 miyon itinerario di Mericanonan cu a boek pa biaha, y a busca tambe nan seguro di biahe, e Mericanonan lo cuminsa nan biahe for di aeropuertonan Mericano dia 18 di December y ta bolbe dia 30 di December 2021. Di e 4 miyon ittinerarios, 13% ta biahe internacional, unda cu Aruba ta forma parti di dje. Si haci un calculacion liher, mei miyon di biahero ta reparti den e prome 5 destinacionan incluyendo Aruba. Allianz Partners (AGA Service Company) ta un compania specialisa den seguro di consumidor, y cu centro di operacionan den 35 pais.  

.