Ronde van Aruba awe nochi ta inicia su di 29 edicion

SAVANETA – Awe nochi 8’or ta ranca sali e di 29 edicion di e careda popular ‘Ronde van Aruba’ for di Mariniersk Kazerne na Savaneta. E evento ya a bira un concepto popular unda cu su popularidad ta mustra ora di inscripcion ora cu den un tempo record e ta ‘sold out’. E biaha aki tin 660 participante inscribe, reparti den varios grupo di estafete (151). E ruta ta cubri Aruba completo, y tin varios distancia disponible pa participa, variando di 18, 36 y 72 km. Mayoria di e participantenan ta compete den grupo di 3 of 4 y ta hacie di forma di estafette, osea di relevo. Debi na e reglanan di Covid19, no ta permiti publico presente, sino solamente participante. E competencia antes tabata conoci como un fiesta military, pero esaki awor a amplia y bira un fiesta local di Aruba. Asina mes tin yen di marinier ta compete, for di entre otro Korps Mariniers,  ARUMIL, CURMIL y Koninklijke Marechausee. Potret di archivo di noticiacla di e Ronde van Aruba.