DIMP: Facilidad di KOR ta yuda comerciantenan chikito di pago di impuesto

DIMP: Facilidad di KOR ta yuda comerciantenan chikito di pago di impuesto

Posted on 12/2/2021 3:22 pm AST | Updated on 12/3/2021 11:41 am AST

ORANJESTAD – Comerciantenan chikito por haci un areglo pa paga menos impuesto. Asina vocero di departamento di impuesto DIMP Meverly Romano a bisa e siman aki. Ta trata di un areglo cu ta data di aña 2019 caba, yama KOR (Kleine Ondernemers Regeling) cu ta regla den leynan di BBO, BAVP y BAZV. E ta un areglo pa comerciante chikito cu ta un ‘natuurlijk persoon’. Por pensa riba un ‘eenmanszaak’, manera Taxista, Autobus Chauffeur, restaurant chikito of café of kapsalon. Tin mas categoria chikito cu por bin na remarke di esaki. 

KEN TUR POR BIN NA REMARKE

E ley ta splica ken tur ta bin na remarke y mester ta residencia na Aruba. E empresa no por tin un volumen di benta di mas di 84 mil florin pa aña. Tanten cu bo benta (omzet) ta keda e suma ey of menos, e comerciante por bin na remarke pa pidi pa e areglo aki. E ley ta duna tambe ki ora bo no ta bin na remarke. Ta duna excepcion tambe na comerciantenan cu ta negosha den real estate, y nan no ta bin na remarke pa KOR, ni esnan cu ta huur un pida lugar manera apartamento.

KICO KOR TA DUNA

KOR ta un facilidad fiscal cu ta duna e comerciante chikito, e chens cu e no mester di paga BBO, BAZV ni BAVP durante full e aña. E deber di cumpli cu entregamento di e declaracion y pago tur luna manera tur otro comerciante, e no ta bay tine. Unabez cu e comerciante tin e KOR, e ta haye for di e inspector, e no mester di kibra cabez pa haci e pagonan necesario. Esaki ta un alivio hopi grandi pa mayoria di e comerciantenan aki. Ta duna un ehempel cu si den un luna a genera 5 mil florin na benta, e ora di e 5 mil e tin cu paga 300 na belasting, e ta retene den e negoshi of pa e cubri otro gastonan cu e tin. Nan mester entrega si kico tabata na omzet di januari te December. Si e comerciante surpasa e 84 mil pa aña, e ora DIMP ta cobre impuesto riba e diferencia.

  • Powered by SETAR