Aruba ta vigila asunto di visa pa mericanonan drenta Venezuela

ORANJESTAD – E regimen di gobierno di Venezuela awe a duna embahada mericano un tempo di 15 dia pa reduci su personal total di 100 hende te na 17. E mesun cantidad di personal cu Venezuela tin na su embahada na Merca. Esaki ta un ‘follow up’ di e declaracion haci diasabra ultimo di e presidente venezolano Nicolas Maduro como un medida di represaya di Merca contra Venezuela.

REACCION ARUBA

Gobierno di Aruba no ta basa su mes riba expresionnan politico di un pais. Esaki ta e reaccion di minister di transporte Otmar Oduber riba e decision di presidente venezolano Nicolas Maduro cu ta exigi mericanonan pa tin un visa pa drenta Venezuela. “Nos ta basa nos mes ariba e realidad di kico Aruba ta atrae y dirigi su mes ariba. E no ta kita afo cu Venezuela ta un bisiña hopi serca, cu ta e unico motibo pa wak e di serca.

NO TA PREOCUPA

E mandatario a mustra cu ora e momento ey yega, cu di berdad Venezuela cuminsa exigi visa pa mericano drenta nan pais, lo mira kico lo sosode. “Nos a tende e presidente expresa hopi cos den e ultimo añanan y lo tin cu mira enberdad kico ta cristalisa y kico ta bira berdad pa nos mira con nos ta bay actua”. Mas aleu e la bisa cu e no ta precupa si Venezuela mester sera su portanan pa mericanonan. “ Esey ta un problema politico, economico, diplomatico. “