UNWTO: 2021 Turismo mundial lo perde 2 triyon di dollars Mericano

MADRID - E recuperacion den Turismo ta bay ta Fragil y Slow debi na e Olanan di e pandemia y variantenan cu ta surgi, awo ta Omicron.  Segun Zurab Pololikashvili, Secretario General di United Nations World Tourism Organisation cu cede na Spaña; Turismo mundial lo hiba un perdida enorme di alrededor di 2 TRIYON di US Dollars e aña aki.

Actualmente Europa ta e epicentro di pandemia y ta sufriendo golpinan enorme debi na aumento di casonan den e di 4 ola cu nan ta experienciando. E noticia di variante nobo y inseguridad di vacuna contra di e variante awe a haci cu e mercadonan financiero a wordo sacudi.  Moderna a informa cu nan vacuna no lo ta mes efectivo contra di e variante nobo Omicron. E organisacion mundial di turismo ta conseha pa paisnan revisa bon nan protocolnan y pa haci palabracionnan cu otro pa evita confuison ora di biahe.

Tin diferente factor cu ta influenciando e confiansa di e biahero; e grado di vacunacion den e pais, e medidanan y cantidad di casonan activo den e pais. Na e momentonan aki tin 46 pais cu tin 21% di tur e casonan di Covid y nan frontera ta cera, mientras cu tin 55 otro pais cu a cera nan frontera parcialmente. Aki na Aruba nos ta depende casi completamente di e Turismo Americano y na e momentonan aki esey ta bayendo bon te ainda, nos lo por cera aña cu alrededor di 72% di recuperacion. Sinembargo manera cu cos ta pinta, nada ta sigur, e incertidumbre debi na e olanan di pandemia y e viariantenan cu por surgi ta causa cu mester introduci mas medida y na su turno ta causa instabilidad den confiansa di e biahero y economia. Na e momentonan aki a nota un aumento leve den demanda pa buelo mundialmente den e ultimo kwartaal di 2021, sinembargo ta dificil pa cualkier pais, of compania haci proyeccion adecuado pasobra bo no sa kiko tin mayan, aki 6 luna of aki un aña.  Ayera e di 24 edicion di e Asamblea General di UNWTO a cuminsa na Madrid, 1000 participante di 135 pais lo atende e cumbre mundial aki den temponan hopi dificil pa e industria di Turismo.