Sasha Figueroa a bandona e banda popular Tsunami

ORANJESTAD – E cantante principal di e banda Tsunami, Sasha Figueroa, ta stop di canta cu e banda ‘pa un tempo indefini’. Asina e cantante a laga sa via media social ayera. E no a duna motibo, sino solamente cu e lo ta indefini. “Debi na asina tanto preguntanan via whatsapp, messages, inboxes etc, mi ta kere cu esaki ta e miho manera pa contesta tur hende” Sasha a cuminsa na bisa. “Pa boso informacion, mi kier a avisa, cu desde awe, lo e no ta cantando pa un tempo indefini, cu mi banda Tsunami”. Na final Sasha ta gradici tur hende cu a sostene semper. Sasha Figueroa tabata co-doño di e banda, hunto cu Ofo Escudero y demas persona. Pero for di tempo cu Escudero a bandona e grupo, Sasha a keda. Despues a busca mas integrante, manera Maya Marin y Mitch Almary. Pero pa basta tempo caba, a nota cu Sasha no tabata cantando activamente cu e banda mas. Mas y mas e tabata keda ausente. Y awor e la participa cu su presencia lo no tey mas. No ta conoci si esaki ta algo definitivo, y cu e ta separa di e banda pa semper.