Merca a ‘upgrade’ e conseho di biahe pa Aruba

NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon. 

ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal.  Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba. 

LOS ANGELES – Conocido personahe Mericano O.J. Simpson, a fayece na edad di 76 aña di cancer. Asina su famia a anuncia diahuebs. E tabata rondona pa su yiunan y nietonan. Na februari, Simpson a keda diagnostica cu cancer di prostaat, y tabata den cuido di hospice durante su tratamento di kimoterapia. E tabata hopi famoso pa su logronan como futbolista americano (rugby) durante 11 temporada. Pero e ta mas ‘conoci’ ainda pa e caso legal unda cu a culpe pa asesina su ex casa Nicole Simpson na 1994.  E la keda absolve di e cargo ey, pero despues a drenta prizon toch pa otro cargonan di robo di memorabilia. 

BOGOTA – Entrante awe, cuidadanonan di Bogota y becindario ta haya nan mes den un situacion fastioso cu awa. Esaki debi cu a cuminsa ‘schakel’ entre municipio pa awa debi cu e nivel di e lugarnan cu ta abastece e zona cu awa, ta hopi hopi abou. Pa sigura cu toch tin un fluho di awa y pa tin miho control pa tur hende haya awa, a dicidi pa schakel e proceso di awa. Esey kier men cu ta spaar asina dos metro cubico pa seconde di awa, y ta garantisa suministro di awa aceptabel pa por lo menos 10 miyon di persona. Un di e problemanan ta e fenomeno di El Niño cu ta causa esaki tambe. E ciudad ta parti den 9 zona cu ta suspende e awa cada 24 hora pa turno. Hunto cu publicacion di un schedule, ta haya sa ken tin awa ki ora. 

TORONTO – Un grupo di por lo menos 100 Arubiano recientemente a bishita Canada y experencia un wega di baseball grandes ligas di e ekipo di Toronto Blue Jays na cas, contra Seattle Mariners. Ta trata di (segun e raportahe di un canal di television Canades) 12 docente y mas di 80 studiante cu pa prome biaha ta experencia un wega di baseball di grandes ligas di Merca (na Canada). Entre nan tabatin e docente Anchelino Vrolijk cu tambe a keda entrevista pa e periodista, unda cu Vrolijk ta splica su emocion di por wak un wega asina pa prome biaha. Asina, e grupo di studiante ta haya cobertura internacional di nan bishita na e stadion na Canada e siman aki. 

LONG ISLAND – Un dokter Mericano di mucha, a fayece dialuna na caminda pa New York pa wak e eclipse solar. Ta trata di Monica Woroniecka (58). E tabata den un caravana chikito, ora cu e porta a dal habri den pleno careda, cu a saca Woroniecka y bente riba caminda. Despues e la fayece na hospital. E casa tabata den e pickup cu tabata trek e caravana mara patras. E dokter a opta pa sinta den e caravana mientras cu e tabata wordo ranca, algo cu ta illegal na Merca. Dado momento e porta di e caravana a bula habri, y benta e dokter afo.