Cumpra bandera cu color robes, lo costa caro despues

ORANJESTAD - Pueblo di Aruba mester cumpra y bende unicamente e bandera oficial segun stipula den ley. Aunke cu e ley no a pasa ainda, cumprando bandera corecto lo evita problema den futuro. Den combersacion cu minister di Cultura Otmar Oduber, e la splica NoticiaCla.com cu esnan cu cumpra material incorecto awor, lo haya problema despues. Pesey e peticion pa for di awor caba, cumpra e bandera cu e colornan corecto.

LEY

E ley ainda ta na Raad van Advies y probablemente lo por wordo implementa te na April. Esaki lo ta ‘laat’ pa enforse pa e temporada prome cu 18 di maart. Pero despues, esnan cu bay hisa banderanan cu color robes, lo por haya multa.” Si ta bai cumpra un bandera di Aruba, por fabor percura pa cumpra unicamente e bandera di color oficial manera e la wordo escohi na aña 75” e mandatario a bisa.

COMERCIANTENAN 

Comerciantenan tambe a haya un tipo di alerta. Aki a pidi e comerciantenan tambe cu ta bende e banderanan, pa no bai haci uso di e oportunidad aki pa bai bende e banderanan cu no ta conforme e ley of regla oficial, djies pa sali di e banderanan aki. E mandatario ta pidi pa nos ta arubianonan consciente di cu e color di nos bandera y nos simbolonan, ta un importancia enorme pa nos.